Аԥснытәи аҳәынҭқарратә универсиет даҭааит австриатәи аҭҵаарадырратә институт иԥсабаратәым аинтеллекти, OFAI акибернетикатә ҭцаарадыррақәа реилазаареи аҭҵаарадыратә усзуҩы еиҳабы, адоктор Тристан Миллер.

Тристан Миллер аус ахьиуа техасстәи ауниверситет алабораториа аҟны иҭырҵаауеит онтологиа шьаҭас иаҭаны иԥсабаратәу абызшәа аус адулашьа. Ари азҵаара хшыҩзышьҭра ду арҭоит ААУ Алингвистикеи аинформациатә технологиақәеи р-Центр анапхгареи, ААУ абызшәатә кафедрақәа русзуҩцәеи. Тристан Миллер ипрезентациақәа рыла ишьақәирӷәӷәон, алингвистика аҟны ишьақәгылоу "Каламбур" ҳәа изышьҭоу аметод, абызшәа аиҭагаратә теориа аҟны аиҭагаҩцәа ирызцәырҵуа ауадаҩрақәа рыҭҵаареи аинтерактивтә формахь аиагареи.

ААУ алингвистикеи аинформациатә технологиақәеи р-Центр аинформациатә хархәагақәа р-Сектор анапхгаҩы Андреи Абыхәба дахцәажәеит аԥсуа бызшәа акомпиутертә технологиақәа раларҵәараз аус здыруло ахырхарҭақәа, дазааҭгылеит ашрифтқәеи аԥсуа клавиатуреи адраиверқәеи, аклавиатура атренажиор алокализациеи иара азы аурокқәа реиқәыршәареи атәы.

Афилол.ҭҵ.рд., апрофессор, ААУ аҭҵаарадырра аҟәша апроректор, ААУ Алингвистикеи аинформациатә технологиақәеи р-Центр анапхгаҩы Џьулетта Адлеиба иҭабуп ҳәа иалҳәеит аҵарауаҩ, иазгәалҭеит ари ахырхарҭа аус адулара шхымԥадатәиу.

Аусмҩаԥгатә рхы аладырхәит ААУ аԥсуа бызшәа акафедра № 1 аиҳабы, афилол.ҭҵ.рдоктор, апрофессор Оҭар Ӡиӡариа, ААУ англызи анемеци бызшәақәа ркафедра аиҳабы Гәында Гьерхьелиа, Гәдоуҭа араион Аҵара аусбарҭа аиҳабы Инна Џьугьелиа.

Апрезентациа ахыркәшамҭаз Тристан Миллер ААУ апрофессортә-рҵаҩратә еилазаара рызҵаарақәа рҭак ҟаиҵеит.