Аԥснытәи аҳәынҭқарратә университет афилологиеи ажурналистикеи рфакультет аҟны имҩаԥысит «Абаза жәлар рбызшәеи рлитературеи рфестиваль – 2026» зыхьӡу есышықәсатәи аԥсуа-абаза поезиа афестиваль.

Аусмҩаԥгатә иалахәын ААУ афилологиеи ажурналистикеи рфакультет адекан Баҭал Хагәышь, аԥсуа литература акафедра арҵаҩы еиҳабы, В.П. Анқәаб ихьӡ зху Аԥсуа-адыга филологиа ацентр анапхгаҩы Ахра Анқәаб, аԥсуа литература акафедра арҵаҩы еиҳабы, Аԥсны Аҵарадырра аминистрра аԥсуа бызшәа аспециалист хада Валентина Халбад, В. К. Аргәын ихьӡ зху Гәдоуҭатәи абжьаратә школ N2 аԥсуа бызшәеи алитературеи рырҵаҩы Лиудмила Ристова, абаза абызшәадырҩы, апрофессор, академик Сергеи Пазов, аԥсуа-абаза жәлар рыҿиара иадҳәалоу аиҿкаара «Алашара» абызшәа аҿиара аҟәша анапхгаҩы Заур Меремҟәылов, ашколхәыҷқәа, афилологиеи ажурналистикеи рфакультет астудентцәа.

Аиԥылара аартуа аԥсуа литература акафедра арҵаҩы еиҳабы, В.П. Анқәаб ихьӡ зху аԥсуа-адыга филологиа ацентр анапхгаҩы Ахра Анқәаб иазгәеиҭеит аиԥш зеиԥшу аиԥыларақәа аԥсуа-абаза аҿар рхаҭарнакцәа ргәыбылра шеиздырҳауа, аимадара шрыбжьарҵо, лассы-лассы еибабалартә аҭагылазаашьа шырзаԥырҵо.

Афилологиеи ажурналистикеи рфакультет адекан Баҭал Хагәышь далацәажәеит аиқәшәара ашколхәыҷқәеи астудентцәеи рзы ишԥышәеихаҳагоу, ирзаанартуа аҳәаақәа шыҭбаау, аԥсуа-абаза жәлар рпоезиа аихаҳара ргәацԥыҳәо ишыҟанаҵо атәы.

Апроект «Абаза жәлар рбызшәеи рлитературеи рфестиваль» еиҿкаауп аԥсуа-абаза жәлар рыҿиара иадҳәалоу аиҿкаара «Алашареи», У.Д. Алиев ихьӡ зху Ҟарачы-Черкессктәи аҳәынҭқарратә университет абаза абызшәа ацентри, Ҟарачы-Черкестәылеи Аԥсни Рҵарадырра аминистррақәеи, Аԥсытәи аҳәынҭқарратә университет В.П.Анқәаб ихьӡ зху аԥсуа-адыга филологиа ацентри русеицура иабзоураны.

Аиқәшәара хықәкы хадас иаман исахьаркны аԥсуа шәҟәыҩҩцәа ражәеинраалақәа рыԥхьара. Ақәгыларақәа рыхә ршьон аӡбаҩцәа, урҭ рхыԥхьаӡараҿы иҟан: афилологиеи ажурналистикеи рфакультет адекан Баҭал Хагәышь, аԥсуа литература акафедра арҵаҩы еиҳабы, В.П. Анқәаб ихьӡ зху аԥсуа-адыга филологиа ацентр анапхгаҩы Ахра Анқәаб, аԥсуа литература акафедра арҵаҩы еиҳабы, Аԥсны Аҵарадырра аминистрра аԥсуа бызшәа аспециалист хада Валентина Халбад, В. К. Аргәын ихьӡ зху Гәдоуҭатәи абжьаратә школ N2 аԥсуа бызшәеи алитературеи рырҵаҩы Лиудмила Ристова, абаза абызшәадырҩы, академик Сергеи Пазов, аԥсуа-абаза жәлар рыҿиара иадҳәалоу аиҿкаара «Алашара» абызшәа аҿиара аҟәша анапхгаҩы Заур Меремҟәылов.

Аусмҩаԥгатә шьақәгылан ҩ-хәҭак рыла. Актәи ахәҭаҿы ажәеинраалақәа ирыԥхьон Гагра, Гәдоуҭа, Аҟәа, Гәылрыԥшь, Очамчыра, Тҟәарчал араионқәа рышколқәа рҟынтәи аҵаҩцәа. Урҭ рахьтә иалкаахаз быжьҩык аҳаҭыртә шәҟәқәеи агәаларшәагатә ҳамҭақәеи ранашьан, иара убас зҽалазырхәыз аҵаҩцәа зегьы аршаҳаҭгақәа рнапаҿы идыркын.

Аиқәшәара аҩбатәи ахәҭаҟны аԥсуа шәҟәыҩҩцәа ражәеинраалақәа ирыԥхьон Аԥснытәи аҳәынҭқарратә университет афилологиеи ажурналистикеи рфакультет астудентцәа. Аиԥылара аҳәаақәа ирҭагӡаны урҭ абаза жәеинраалақәагьы ирзааҭгылеит. Аӡбаҩцәа рылкаақәа инарықәыршәаны астудентцәа рахьтә иалкаахеит фҩык афилологиеи ажурналистикеи рфакультет астудентцәа: ажурналистика аҟәша актәи акурс астудент Марианна Дочиа, ажурналистика аҟәша аҩбатәи акурс астудентцәа Лаура Ферызбеи Милана Чхебелиеи, ажурналистика аҟәша ахԥатәи акурс астудент Милена Кәыҵниа, аԥсуа бызшәеи алитературеи рыҟәша ахԥатәи акурс астудентцәа Асҭанда Доӷәызиеи Адам Папааи.

Аусмҩаԥгатә аҟны иалкаахаз астудентцәа алшара рзаԥҵахоит ҭагалан Черкесск ақалақь аҭаара, афестиваль ахыркәшаратә хәҭа аҳәаақәа ирҭагӡаны абаза аҿар рхаҭарнакцәа рыцықәгылара.