Декабр 10 рзы Аԥснытәи аҳәынҭқарратә университет афилологиатә факультет аҟны имҩаԥысит аҵарауаҩ, Ҭырқәтәыла инхо ҳџьынџьуа, аҭоурыхҭҵааҩ, ашәҟәыҩҩы Селчук Сымсыми  афилологиатә факультет апрофессорра-рҵаҩратә еилазаареи астудентцәеи реиԥылара. 

Аиԥылара аартуа, аԥсуа литература акафедра аиҳабы афилологиатә ҭҵаарадыррақәа ркандидат, адоцент Диана Аџьынџьал иазгәалҭеит Ҭырқәтәылатәи ҳашьцәеи ҳареи ҳаибабареи, ҳаизыҟазаашьеи шырҭбаалатәу:

 «Астудентцәа, шәара шәнапы иануп абри аус ԥшьа, цҳангьы шәҟалароуп ҳабжьара» - рабжьалгеит Диана Серапион-иԥҳа.

Ауажәларратә усзуҩы, аиҭагаҩ Оқҭаи Чкотуа инарҭбааны еиҭеиҳәеит Селчук Сымсым ирҿиаратә мҩеи инапы злаку аусхкқәеи, ишәҟәқәа рҟны ажәытә хыҵхырҭақәа ҭҵааны ахархәара шроузи атәы.

Аиԥылара аҳәаақәа ирҭагӡаны иӡырган Аԥсны ахьыԥшымразы ақәԥареи 1992-1993 шықәсқәа рзтәи Аԥсны Аџьынџьтәылатә еибашьреи ирызку Селчук Сымсым «Даҽа ԥсадгьылк ҳамаӡам» ҳәа хыс измоу ишәҟәы.

Ашәҟәы аҭырқәшәахьтә аԥсшәахь еиҭеигеит ауажәларратә усзуҩы, аиҭагаҩ Оқҭаи Чкотуа, редакторс дамоуп Аԥсуаҭҵааратә институт аиҳабы, афилологиатә ҭҵаарадыррақәа ркандидат Арда Ашәба.

Ашәҟәы еиднакылоит аԥсуа жәлар рхақәиҭратә қәԥара аамҭазы Аԥсни, адиаспореи, Нхыҵ-Кавкази, Қырҭтәылеи рыҟны имҩаԥысуаз ахҭысқәа аазырԥшуа адокументқәеи, аибашьра иалахәыз ар рԥызацәеи, ахеидкылақәа рнапхгаҩцәеи рыҿцәажәарақәа.

ААУ аҭҵаараус апроректор, афилологиатә ҭҵаарадыррақәа рдоктор, апрофессор Џьульетта Адлеиба лықәгылараҿы дазааҭгылеит, аԥсуа бызшәа арҿиаразы иҟаҵатәу аусмҩаԥгатәқәеи ажәалагалақәеи.

Афилологиатә факультет адекан, афилологиатә ҭҵаарадыррақәа ркандидат Баҭал Хагәышь иазгәеиҭеит, абызшәеи акультуреи реиқәырхара аус аҿы аҳәынҭқарратә хылаԥшра шаҭаху.

Аԥсуа литература акафедра адоцент Адгур Какоба ҳџьынџьуаҩ Селчук Сымсым аԥсуа жәлар рҭоурых, ркультура, рфольклортә зҵаарақәа ирызкны еиуеиԥшым аҭыжьымҭақәа рҟны иҩымҭақәа акьыԥхь шырбахьоу атәы дазааҭгылеит, иҭабуп ҳәагьы ахиҳәааит автор иааԥсаразы.

Аҵыхәтәаны Селчук Сымсым рҭак ҟаиҵеит афилологиатә факультет астудентцәа  ирҭаз азҵаарақәа.