Азҵаара рыҭара



ИААИУА АШЫҚӘС ҾЫЦ РЫДИНЫҲӘАЛЕИТ

Аҧснытәи аҳәынҭқарратә университет аректор, академик Алеко Гәарамиа аҵараиурҭа аусзуҩцәеи астудентцәеи иааиуа Ашықәс ҿыц рыдиныҳәалеит. 

Ҳаҭыр зқәу сколлегацәа, ауниверситет апрофессор-рҵаҩратә еилазаара, аҵараиурҭа аусзуҩцәа, астудентцәа, аспирантцәа! 

Сааҭқәак роуп иаанхаз Ашықәс ҿыц аныҳәа аҟынӡа. Ҳашьҭахьҟа иаанҳажьуеит даҽа шықәсык, акырӡа иуадаҩыз, имаҷымкәа ахьааи агәырҩеи ҳзынзыжьыз. 

Адунеиаҿ имҩаҧысуа ахҭысқәа, анс акә арс акә, ҳаргьы иаҳныруеит. Убриаан зегьы ирхадароуп аҳәынҭқарраҿы алеишәа ҷыда, аҳәоуеиқәшәара, аидгылара.

Имаҷымкәа ауадаҩрақәа шыҟазгьы, ҳуниверситет еиҧҟьарада аус ауан. Имҩаҧаагеит акымкәа-ҩбамкәа жәларбжьаратәи аҭҵаара-практикатә конференциақәа, афорумқәа. Ҳастудентцәа ракәзар, аҵаратә процесс аҟны еиҧш, алҵшәа бзиақәа аадырҧшит аҳәаанырцә имҩаҧысуаз еиуеиҧшым аицлабрақәа рҟны. Аха урҭ зегь рахьтә иалыскаарц сҭахуп, иҳаҩсуа ашықәс азы зегь раасҭа ихадараз ахҭыс - Аҧснытәи аҳәынҭқарратә университет 90 шықәса ахыҵра.

Ари аныҳәа даҽазныкгьы иаанарҧшит ҳара аҩызцәеи апартниорцәеи маҷҩымкәа ишҳамоу. Уи даҽазныкгьы иарҵабыргуеит ҳиубилеи ахь хыҧхьаӡара рацәала асасцәа раара, ҳҵараиурҭа анапхгареи аколлективи рыхьӡала шәкыла адныҳәаларатә шәҟәқәеи ателеграммақәеи ахьаарышьҭыз. 

Ҳарҭ зегьы аџьабаа заабо, аус заауа ҳҿар рзоуп, ҳҳәынҭқарра уаҵәтәи аҧеиҧш азоуп. Сара сырзыгәдууп ҳара ҳҿар. Урҭ еидгылоуп, иҿыцу блала иахәаҧшуеит иахьатәи ҳаҧсҭазаара. 

Ҳаҭыр зқәу аҩызцәа! 
Ишәыдысныҳәалоит иааиуа Ашықәс ҿыц. Ишәзеиӷьысшьоит, зегь раҧхьа иргыланы, агәабзиара, ақәҿиарақәа, хаҭа-хаҭала, ҩнаҭа-ҩнаҭала - аҭынчреи аманшәалареи! Иҳагымзааит зегьы агәыразреи аилибакаареи! Астудентцәа ирзеиӷьысшьоит аӡынтәи асессиаҿы ақәҿиарақәа!
Ҽаанбзиала шәгәырӷо шәнеилааит!

Алеко ГӘАРАМИА, 
Аҧснытәи аҳәынҭқарратә университет
аректор, академик