Аԥснытәи аҳәынҭқарратә университет аҟны ихацыркуп ҳтәыла араионқәа ирыҵаркуа абжьаратә школқәа рырҵаҩцәа рԥышәеизырҳаразы акурсқәа. Урҭ мҩаԥысуеит Аԥсны аҭоурыхи ауаажәларрадырреи амаҭәарқәа рганахьала. Иазгәаҭатәуп, асеиԥш иҟоу аусмҩаԥгатә шеиҿкаау Аԥснытәи аҳәынҭқарратә университет аҟны иаԥҵоу аквалификациа аизырҳареи акадрқәа реиҭазыҟаҵареи ирызку Ареспубликатә центр абзоурала, Аԥсны Аҵареи абызшәатә политикеи рминистрра алархәны. Акурсқәа раартра рхы аладырхәит Аԥсны Аҳәынҭқарра Аҵареи абызшәатә политикеи рминистр актәи ихаҭыԥуаҩ Ада Кәарҷелиа, ААУ азиндырратә факультет адекан Сергеи Смыр, аҭоурыхтә факультет адекан Алик Габелиа. Аиԥылара аартуа Аԥснытәи аҳәынҭқарратә университет аҟны иаԥҵоу аквалификациа аизырҳареи акадрқәа реиҭазыҟаҵареи ирызку Ареспубликатә центр аиҳабы Медеиа Ченгьелиа аҵараиурҭа анапхгареи, апрофессор-рҵаҩратә еилазаареи, аусмҩаԥгатә зхы алазырхәызи зегьы ирыдылныҳәалеит ауниверситет 90 шықәса ахыҵра, лымкаала иҭабуп ҳәа иалҳәеит ААУ аректор, академик Алеко Гәарамиа, акурсқәа реиҿкаара аус аҟны иҟаиҵаз адгыларазы. Арҵаҩцәа рԥышәеизырҳара аус аҵак ду шамоу дазааҭгылауа Медеиа Ченгьелиа иазгәалҭеит: «Иахьа ҳара ҳаиқәшәара ААУ аҟны машәыршақә иҟамлеит. Ари аҭоурых ду змоу, арҵаҩцәа дуқәа абиԥарала еиҵазааӡахьоу хәышҭаароуп – иахьагьы шәареи ҳареи ҳаидызкылаз иароуп. Аԥснытәи аҳәынҭқарратә университет аҟны иҟоу аквалификациа аизырҳареи акадрқәа реиҭазыҟаҵареи рцентри Аԥсны Аҳәынҭқарра Аҵареи абызшәатә политикеи рминистрреи ҳаиқәышаҳаҭны имҩаԥаагоит Аԥсны аҭоурыхи ауаажәларрадырреи рырҵаҩцәа рзы акурсқәа. Сара салацәажәом арҵаҩы ипрофессионалтә компетенциа аҩаӡара ҵакыс иамоу, шьаҭас иамоу, ҭыԥс иааннакыло аҵара-ааӡаратә процесс аҟны. Уи шхымԥадатәиу дырны иааз шәоуп зегьы. Ҳазҭагылоу аамҭа ирласны аҽеиҭанакуеит. Узқәымгәыӷӡо аҭагылаазашьақәа узцәырнагоит... Аамҭа аҽақәыршәара имариам усуп: хымԥада, арҵаҩы иҭакԥхықәра еиҳагьы иазҳауеит, аҽарҭбаауеит; идыррақәа иҵаҩцәеи иааӡамҭацәеи рҟынӡа азнагашьа дақәшәарц, агәреибагара рцәымӡырц, аимадара рыбжьазарц азы есааира ихәҭоуп атехнологиа ҿыцқәа рызҿлымҳара, ипроффесионалтә компетенциа аизырҳара…». Ацентр аиҳабы лажәақәа рыла, ҩымчыбжь ирҭагӡаны имҩаԥгахо аҽазыҟаҵарақәа азыӡырҩцәа ирнаҭо аԥышәа маҷым. Арҵаҩцәа ироуа адырра ҿыцқәа анаҩс ашколқәа рҟны иҟоу аметодикатә хеидкылақәа ирымардоит. «Ишдыру еиԥш, ашкол аҟны иҟоу аҭагылазаашьа зеиԥшроу иаҿырԥшны ауп ауниверситет аҟны алҵшәақәагьы шыҟало: ашкол аушьҭымҭа бзиа, адырра ҳаракы змоу, иреиҳау аҵараиурҭаҟны дҿырԥшыганы дҟалоит. Иара убасгьы, ауниверситет аҟны аҵарадырреи арҵареи рус ахаҭабзиара шаҟа иҳараку аҟара, ашкол ахь иазыҟаҵаны ихынҳәуеит адырра змоу, зыквалификациа ҳараку арҵаҩцәа. Убри азы ихадароу, зеиԥш усны, иӡбатәны иҳамоу – ашколтә ҵара ахаҭабзиара ашьҭыхра ауп», – иазгәалҭеит Медеиа Ченгьелиа лықәгылараҿы. «Ахәыҷы иааӡара, адыррақәа иҭара, ихаҭара ашьақәыргылара, ауаҩреи аламыси илааӡара – баҩхатәра дууӡоуп, знапы ианугьы шәара шәоуп, арҵаҩцәа. Шәнапы злаку аусқәа рҟны ишәзеиӷьысшьоит аманшәалареи ақәҿиарақәеи», – лҳәеит акурсқәа раартраҿы иқәгылаз Аҵареи абызшәатә политикеи рминистр актәи ихаҭыԥуаҩ Ада Кәарҷелиа. «Ҳара ҳзы игәадуроуп, игәырӷьароуп, ҳҵараиурҭа аушьҭымҭацәа иахьа зыҩаӡара ҳараку арҵаҩцәа ирывагыланы аус ахьыруа. Сара иахьа абраҟа избоит ҵыԥхи ҵыԥхцәеи, иара убас жәашықәса раԥхьа аунивесритет иалгаз ҳаушьҭымҭацәа, ҳаспиранцәеи ҳмагистрцәеи уҳәа. Уи иаршаҳаҭуеит ҳҵараиурҭа аушьҭымҭацәа аԥхьаҟагьы рдыррақәа ишрыцырҵо, рԥышәа шеиздырҳауа», – иазгәеиҭеит аҭоурыхтә факультет адекан Алик Габелиа. Азиндырра афакультет аиҳабы Сергеи Смыр иакәзар, иқәгылараҿы иҳәеит: «Ҳара зегьы уск ауп ҳазҿу. Ишәызцәырҵуа азҵаарақәа зегьы рҟны адгылареи ацхыраареи шәаҳҭоит. Ҳара аус аауеит иахьатәи амш мацаразы акәымкәа, аԥхьаҟазы. Исҭахуп, еиуеиԥшым аҭагылазаашьақәа ирыхҟьаны ҳара иаҳзыҟамҵаз, ҳазхьымӡаз акрыҟазар, шәара, еиҵагыло аҿар иҟашәҵарц, ихашәырҭәаарц. Убри аҟны зегьы ишәзеиӷьысшьоит аманшәалара». Иазгәаҭатәуп, еиуеиԥшым ахырхарҭақәа рыла асеиԥш акурсқәа рымҩаԥгара ААУ аҟны иҟоу аԥышәеизырҳареи акадрқәа реиҭазыҟаҵареи рцентр есышықәса ишеиҿнакаауа. Урҭ хықәкы хадас ирымоуп арҵаҩцәа рԥышәа аизырҳара, аҵара-ааӡара аус аҿы ицәырҵуа аҿыцрақәа, ҳаамҭазтәи аметодикатә знеишьақәа уҳәа рымадара, реихаҳара. Азыӡырҩцәа рзы алекциақәа мҩаҧыргоит ААУ апрофессор-рҵаҩратә еилазаара ахаҭарнакцәа, аҧышәа ду змоу ашколқәа рырҵаҩцәа, иара убасгьы иааҧхьоу аспециалистцәа. Ацентр абзоурала акурсқәа рзыӡырҩцәа зегьы ҳамҭас рнапаҿы ирыҭан Аҧсны аҭоурыхи ауаажәларрадырреи ирызку еиуеиҧшым аҭыжьымҭақәа. Аԥсны аҭоурыхи ауаажәларрадырреи рзы ихацырку арҵаҩцәа рԥышәеизырҳара акурсқәа хыркәшахоит ноиабр 11 рзы. Азыҟаҵара аҳәаақәа ирҭагӡаны азыӡырҩцәа рзы имҩаԥгахоит алекциақәа, асеминарқәа, астол-гьежьқәа, иара убасгьы ирзеиҿкаахоит Аԥсны аҭоурыхтә ҭыԥқәа рахь аныҟәарақәа.