86 шықәса дшырҭагылаз лыԥсҭазаара далҵит  Аԥснытәи аҳәынҭқарратә университет асахьаҭыхратә ҟазареи адизаини ркафедра адоцент, Асовет Еидгылеи Аԥсныи еицырдыруаз асахьаҭыхҩы, арҵаҩы, аиллиустратор,  Аԥсны зҽаҧсазтәыз арҵаҩы Зоиа Ҟәашә-иԥҳа Аџьынџьал.

Аԥснытәи аҳәынҭқарратә университет аректорати, аҟазарақәа рыҟәша апрофессор-рҵаҩратә еилазаареи астудентцәеи гәалсра дула ирыдышшылоит Зоиа Ҟәашә-иԥҳа лҭаацәеи, лыуацәеи, лҭынхацәеи.

Асахьаҭыхҩы, арҵаҩы Зоиа Ҟәашә-иԥҳа лгәалашәара лаша лааӡамҭацәеи, лколлегацәеи, дыздыруаз зегьы наунагӡа ргәаҵаҟны иаанхоит.

Зоиа Ҟәашә-иԥҳа Аџьынџьал 20 шықәса инареиҳаны ААУ асахьаҭыхратә ҟазара акафедраҿы аус лухьан. Лусумҭақәа Аҧсны амилаҭтә цәыргақәҵатә галереиеи еиуеиԥшым атәылақәа рцәыргақәҵатә залқәеи рҟны иҵәахуп.

Зоиа Аџьынџьал 250 шәҟәы инареиҳаны иллиустрациала илҩычахьан. 1980 шықәсазы Ҭырқәтәыла имҩаԥысуаз жәларбжьаратәи ашәҟәтәы цәыргақәҵаҿы лбаҩхатәра ахә ҳаракны иршьахьан. Асахьаҭыхҩы лааԥсареи ллагалеи рацәоуп аԥсуа графика аҿиара аус аҟны, еиҵалааӡахьан асахьаҭыхыҩцәа рабиҧарақәа маҷҩымкәа. Убарҭ зегьы азгәаҭаны Зоиа Ҟәашә-иԥҳа иланашьан «Ахьӡ-Аԥша» аорден III аҩаӡара.

1992 ш. лусумҭа «Портрет старика» зыхьӡыз цәырган Генуиа имҩаҧысуаз жәларбжьаратәи ацәыргақәҵаҟны.

1963 шықәса инаркны активла лхы алалырхәуан Аԥсны асахьаҭыхыҩцәа реидгыла аԥшьгарала еиҿыркаауаз ацәыргақәҵақәа рҟны. 2007 шықәсазы Ацәыргақәҵатә зал хада аҟны имҩаԥган асахьаҭыхҩы хаҭалатәи лцәыргақәҵа. Лхы рылалырхәуан Аԥсныи Урыстәылеи имҩаԥысуаз  ацәыргақәҵақәа.