Ҳаҭыр ду зқәу Алеко Алықьса-иԥа!
Жәытәнатә аахыс аԥсуа жәлар ирылиаауан аҵеицәа иашақәа, аҧхьагылаҩцәа, амилаҭтә фырхацәа, аҵарауаа нагақәа, арккаҩцәа дуқәа. Убарҭ рахьтә Шәара шәыруаӡәкуп ҳаамҭазы Аҧсны адунеи иадыруа иҟазҵаз аҵарауаа.
Ҳара ҳзы игәадуроуп Шәара – адунеиаҿ еицырдыруа аҵарауаҩ, аԥсуаа рахьтә раԥхьаӡакәны афизика-математикатә ҭҵаарадыррақәа ирдокторхаз, апрофессор, аҵареи аҭҵаарадырреи рус аиҿкааҩ, Аԥсны аҭҵаарадыррақәа ракадемиа академик, Адыгатәи жәларбжьаратәи аҭҵаарадыррақәа ракадемиеи, Европатәии Урыстәылатәии аԥсабаратә ҭҵаарадыррақәа ракадемиақәеи рлахәыла, М.В. Ломоносов ихьӡ зху Москватәи аҳәынҭқарратә университети Оксфордтәи Академиатә Еидгылеи рҟны Ҳаҭыр зқәу апрофессор, Адыгьеиатәи, Арцахтәи, Приднестровиатәи ауниверситетқәа Ҳаҭыр зқәу рдоктор, Аԥсни Аахыҵ-Уаԥстәылеи аҳәынҭқаррақәа рҟны аҭҵаарадырра зҽаԥсазтәыз аусзуҩы, Европатәи аректорцәа рклуб алахәыла, Оксфордтәи Академиатә Еидгыла иалоу, 1991-1996 шш. рзы Аԥсны Аҳәынҭқарра Иреиҳаӡоу Асовет - Апарламент адепутатс иҟаз, «Ахьӡ-Аԥша» аорден I аҩаӡара занашьоу – ҳмилаҭтә университет напхгара ахьашәҭо.
Шәара шәлагалеи, шәааԥсарақәеи, шәхыԥшеи ирыбзоураны, ҳҵараиурҭа ахьӡ хара инаҩхьеит. Урҭ ирлыҵшәаны Аԥснытәи аҳәынҭқарратә университети Урыстәылатәии, егьырҭ аҳәаанырцәтәи атәылақәа руниверситетқәеи рыбжьара аусеицуразы аиқәшаҳаҭрақәа жәпакы рыбжьоуп, ишьақәыргылоуп жәларбжьаратәи аҵаратә, аҭҵаарадырратә, акультуратә еимадарақәа. Аԥсни Урыстәылеи рыбжьара аиҩызаратә еизыҟазаашьақәа рырӷәӷәаразы Урыстәылатәи АфедерациаАпрезидент иҟынтә хаҭала Аҳаҭыртә шәҟәы шәанашьан.
Напхгаҩык, ҵарауаҩк иаҳасабала шәусура, ганрацәала еиларсу шәхаҭара еиҵагыло аҿар рзы еснагь иҿырҧшыгоуп.
Гәык-ԥсыкала ишәзеиӷьаҳшьоит агәабзира, аманшәалара, ақәранҵыра ду, шәнапы злаку аусқәа рҟны аихьӡареи аартра ҿыцқәеи. Ҳҳәынҭқарреи ҳажәлари шьардаамҭа шәрыгымзааит!