Аԥснытәи аҳәынҭқарратә университет агронџьныртә факультет "Аенергетикатә система", аелектроенергетикеи аелектротехникеи ахырхарҭала аҵара зҵо астудентцәа рыквалификациа-аушьҭымҭатә усумҭақәа рыхьчара мҩаԥысит.
Аҳәынҭқарратә аттестациатә комиссиа хантәаҩра аиҭон "Амшынеиқәафымцамч" адиректор хада иабжьгаҩ, Аԥсны Аҳәынҭқарраҟны ҳаҭыр зқәу аенергетик Иури Харитон-иԥа Қәычбериа, амаӡаныҟәгаҩ - агронџьныртә факультет адекан, адоцент Розета Алеқсандр-иԥҳа Смыр.
Аттестациатә комиссиа иалахәын: "Аенергетикатә система" акафедра аиҳабы, атехникатә ҭҵ. рканд. Маи Кимкетов; атехникатә ҭҵ. рканд. "Аенергетикатә система" акафедра адоцент Расим Камлиа; атехникатә ҭҵ. рканд. "Аенергетикатә система" акафедра адоцент Едуард Маи-иԥа Кимкетов; акомиссиа амаӡаныҟәгаҩ Фатима Алик-иԥҳа Кәарҷиа.
Аквалификациатә усумҭақәа рызкын аенергетика ахырхырҭаҟны актуалра зҵоу аҭҵаарақәа жәпакы. "Аенергетикатә система" акафедра аиҳабы Маи Кимкетов иажәақәа рыла 80 % "Аенергетикатә система" акафедра аушьҭымҭацәа Аԥсны еиуеиԥшым афымцамчтә станициақәеи аподстанциақәеи рҟны аус руеит қәҿиарала. Иазгәеиҭеит, аҵараиурҭа аҟны алекциақәа ишрыԥхьо зыхьӡ нагоу аенергетикцәа, уимоу акафедраҟны ишазԥхьагәаҭоу еиуеиԥшым апрақтикатә ҭҵаарақәа рымҩаԥгара.
"Амшынеиқәафымцамч" адиректор хада иабжьгаҩ Иури Кәычбериа иажәақәа рыла Аԥснытәи аҳәынҭқарратә университет "Аенергетикатә система" акафедра аушьҭымҭацәа ауниверситет аҟны ироуа атеориатә дыррақәа шьақәдырӷәӷәоит ҳҳәынҭкарра афымцамчтә наплакқәа рҟны. Сынтәа, аҿкы чымазара иахҟьаны астудентцәа рыпрақтикатә ҭҵаарақәа рҟны маҷк ахьысҳара шыҟазгьы, иааидкыланы аушьҭымҭацәа алҵшәа бзиақәа аадырԥшит.
Агронџьныртә факультет адекан Розета Смыр аквалификациатә усумҭақәа ртемақәа дырзааҭӷыло иазгәалҭеит, урҭ зегьы Аԥсны еиуеиԥшым араионқәеи, ақалақьқәеи рнаплакқәа рҟны афымцамч аҭагылазаашьа ишазырхоу.
Иахьазы, аквалификациатә усумҭақәа рыхьчеит 11-ҩык "Аенергетикатә система" ахырхарҭала аҵара зҵо астудентцәа.