Лаҵарамза 24 Аԥснытәи аҳәынҭқарратә университет афилологиатә факультет аҟны иазгәарҭеит аславиантә ҩыреи акультуреи ирызкыз аусмҩаԥгатә.

Уи аҽны иргәаладыршәеит аславиантә ҩыреи акультуреи аԥызҵаз аишьцәа, ацҳаражәҳәаҩцәа Кирилли Мефодии.

Аусмҩаԥгатә иаман аҭҵаарадырратә ҟазшьа. Аславиантә ҩыреи акультуреи ирызку амш мҩаԥыргон 1-тәи акурс астудентцәа Николь Кәакәасқьыри Диане Григориани.   1-тәи акурс астудентцәа Виқториа Ежовеи, Рада Мамацевеи, Доминика Бигәааи рықәгыларақәа агәахәара ду рнаҭеит азыӡырҩцәа.  3-тәи акурс астудентка Ариана Мамацева аиԥылара лырԥшӡеит аславиантә ашәа анагӡарала.

Аусмҩаԥгатә аиҿкааразы аџьабаа збаз зегьы иҭабуп ҳәа рарҳәеит аурыси аҳәаанырцәтәии акафедра аиҳабы Наҭелла Бахиеи, аурыс бызшәа акафедра аиҳабы Риҵа Оҭырбеи. Аурыс культуратә Центр анапхгаҩы Наталиа Каиун астудентцәа рықәгыларақәа рзы ҳамҭас ирылҭеит  рзанааҭтә ус аҟны ихархәагоу арҵагатә литература. Арҵаҩы еиҳабы, 1-тәи акурс астудентцәа ркуратор Роза Саакиан иазгәалҭеит астудентцәа ари амш ҭакԥхықәрала ишазнеиз.

Ҷыдала ахәаԥшыҩцәа ирыдыркылеит аславиантә шьаҭала еиқәыршәаз аекспозициақәа.