Аԥснытәи аҳәынҭқарратә университет аҟны имҩаԥысит изаамҭанытәиу есышықәсатәи аекономикатә факультет 3-тәи акурсқәа "Аҳасабырбеи аудити", "Афинансқәеи акредити" рхырхарҭақәа рыла аҵара зҵо астудентцәа  реихшьаалатә ԥышәара - "Деловаиа игра" ҳәа хыс измаз аинтерактивтә хәмарра.

Аусмҩаԥгатә еиҿылкааит  аекономикатә ҭҵаарадыррақәа ркандидат, ААУ аҳәынҭқарратә напхгареи аменеџьменти ркафедра адоцент,  аҳасабеилыргаҩ хада Анжела Барцыц.

Ажиури хантәаҩра алҭон аекономикатә факультет адекан Ева Озган, иара убас ажиури иалахәын аҳәынҭқарратә напхгареи аменеџьменти ркафедра  аиҳабы Хәыта Гәымба,  аекономикатә факультет адекан лхаҭыԥуаҩ  Инал Хамгоков.

Аусмҩаԥгатә рхы аладырхәит ААУ анапхгареи, аекономикатә факультет  апрофессор-рҵаҩратә еилазаареи, астудентцәеи, Аҟәатәи ауараштә зауад аусзуҩцәеи.

"Деловаиа игра" аҟны еицлабуан ҩ-командак:  "Аҳасабырбеи аудити", "Афинансқәеи акредити" рхырхарҭақәа рыла аҵара зҵо астудентцәа.

Акомандақәа рыхәмарра  аҟны ицәырган иаԥырҵаз "анаплакқәа". Урҭ аиҿкаарақәа рҟны астудентцәа инарыгӡон еиуеиԥшым аҭакԥхықәратә маҵзурақәа: адиректор, амаркетолог, атехнолог, аиурист,  анџьныр, абухгалтер. Рмаҵурақәа инарықәыршәаны аиндаҭлара иалахәыз рколлегацәа рҟынтә азҵаарақәа рҭак ́ҟарҵар акәын. Анаҩс, анаплакқәа  рхаҭарнакцәа еилацәажәаны ииашоу аҭак ҟарҵон. Иара убас аусмҩаԥгатә алахәылацәа идырбан астудентцәа иаԥырҵаз аиҿкаарақәа рҭоурыхи, русуреи ртәы аазырԥшуа авидеороликқәа, ицәырган рхатәы ԥҵамҭақәа.

Аҵарауаҩ Анжела Барцыц лажәақәа рыла  ас еиԥш иҟоу ахәмарра маругоуп аменеџьмент азанааҭ аҟны изхысхьоу  атеориатә материал апрактика аҟны ашьақәырӷәӷәаразы, астудентцәа ирыднаҵоит напхгара зырҭо анаплакқәеи аиҿкаарақәеи рҟны аекономикатә план ашьақәыргылара, иара убас рконкурентцәа рацәажәараҟны аԥышәа арҳара.   Анжела Барцыц иҭабуп ҳәа ралҳәеит  ахәмарра аиҿкаараҟны ацхыраара ҟазҵаз  Аҟәатәи ауараштә зауад анапхгара, ҷыдала  Амра Григори-иԥҳа Ануа.

Аусмҩаԥгатә хыркәшо, аекономикатә факультет адекан Ева Озган ирыдылныҳәалеит сынтәатәи ашықәс иалакӡаны напхара зылҭо афакультет рықәҿирақәа: жәларбжьаратәи аҭҵаарадырратә аолимпиадаҟны астудентцәа риааиреи, аволеибол аҟны аекономикатә факультет астудентцәеи реихьӡареи рзы. Иахьатәи ахәмарыҩцәа ирзеиӷьалшьеит ақәҿиарақәа. 

Иазгәаҭатәуп, "Деловаиа игра" ахәмарыҩцәа  "Аменеџьмент" азанааҭ ала ԥышәарада аԥшьбатәи акурс ахь ишиагахо.