Аԥснытәи аҳәынҭқарратә университет аекономикатә факультет  астудентцәа 12 балл рыла иеиҳаны аиааира ргеит есышықәсатәи жәларбжьаратәи астуденттә олимпиадаҟны аекономика аҭоурых аҵарала. Уи азкын сынтәа 250-шықәса зхыҵыз Давид Рикардо аекономикатә ҭҵаара аҟны иалаигалаз аҷыдарақәа.  ААУ акоманда 38 балл роуит. Аолимпиада мҩаԥысуан Москва,  Урыстәылатәи Аҳәынҭқарра Ахадара иатәу Афинанстә университет аҟны. Аолимпиада рхы аладырхәит еиуеиԥшым  ауниверситетқәа:  М.В. Ломоносов ихьӡ зху Москватәи аҳәынҭқарратә университет,  Урыстәылатәи Аҳәынҭқарра Ахадара иатәу Афинанстә университет "Иреиҳау аекономика ашкол", Белоруссиатәи аҳәынҭқарратә университет, Осетитатәи  аҳәынҭқарратә университет, Тимириазев ихьӡ зху Урыстәылатәи аҳәынҭқарратә университет,  Л.Н. Гумилиов ихьӡ зху  Евразиатәи амилаҭтә университет,  Аль-Фараби ихьӡ зху Казахтәи амилаҭтә университет, Т.Шевченко ихьӡ зху Приднестровиатәи аҳәынҭқарратә университет.
Ари ахҭыс аҳаҭыраз ААУ а́ҟны имҩаԥысит аиааира згаз астудентцәа аҳаҭыртә шәҟәқәеи аԥаратә ҳамҭақәеи рыҭара. 
Аусмҩаԥгатә рхы аладырхәит Аԥсны аԥыза-министр ихаҭыԥуаҩ, афинансқәа рминистр Владимир Делба, Аԥсны аекономика аминистр Кристина Озган, ААУ апрофессор-рҵаҩратә еилазаара, аиааира згаз астудентцәа.
Аиԥылара аартуа ААУ аректор, академик Алеко Гәарамиа иазгәеиҭеит: "Ҳаҭыр зқәу еизаз зегьы, шәара ҳастудентцәа иахьа аҳамҭа ду ҳзыҟашәҵеит, ҳара ҳзы иныҳәоуп ари ахҭыс. Сара сақәшаҳаҭым ианырҳәо ас иеиԥш иҟоу ахшыҩҵак "Дыҟам аԥааимбар иԥсадгьыл аҟны" ҳәа, шәара шәеиԥш иҟоу - зыԥсадгьыл ахьӡ ҭызго ԥааимбарк иваҟәалоит. Сара агәаҳәара ду сымоуп ҳастудентцәа зегьы шәара шәеиԥш аҵарадырра идеиа хаданы ирзыҟалар. Шәара  шәеиԥш иҟоу аҿар ҳҳәынҭқарра ахԥшеи апатуи ҳараркуеит.  Аолимпиада ахықәкы ҳаракуп, уи иҭнаҵаауеит аекономика атеориа аҭоурых. Иарбанзаалакгьы, ауаҩы инапы злаикуа зегьы дрыхәаԥшуазароуп аҭоурыхтә ԥеиԥш ашьаҭала.  Сара гәыкала ишәыдысныҳәалоит шәиааира шьахә. Аҿар бџьарс ишәымоу аҵарадырра ауп.  Иҭабуп ҳәа шәасҳәоит аиааира згаз ҳастудентцәа рырҵаҩцәа!".
Аиԥылара аҳәаақәа ирҭакӡаны жәларбжьаратәи аолимпиадаҟны аиааирга згаз астудентцәа: Самеи Ашәбеи, Қьамал Кәыр-иԥеи,  Алхас Ӷәынџьиеи, Леон Ҷкадуеи, Анна Бжьаниеи, Асмаҭ Багаҭелиеи, Лана Аҭрышбеи, Лаша Зарандиеи, Алиас Кәыҵниеи, Лери Аршбеи аҳаҭыртә шәҟәқәа ранашьан.
Иазгәаҭатәуп, аиԥылара ихы шалаирхәыз  ААУ аекономикатә  факультет аҟны аекономика аҭоурых иаԥхьоз, зыԥсҭазаара иалҵхьоу  Андреи Олег-иԥа Бӷажәба иаб апрофессор, аҭоурыхҭҵааҩ  Олег  Хәыхәыт-иԥа Бӷажәба. Уи иазгәеиҭеит: "Шәырҵаҩы иџьабаа шәмырӡит, иҭабуп, иԥсы ҭазҭгьы иахьа  ари ахҭыс гәырӷьарахон иара изы".
ААУ аекономикатә теориа акафедра  арҵаҩы Анна Адлеибеи,  аекономикатә теориа акафедра адоцент Алеқсандр Страничкини астудентцәа разыҟаҵара аус азы аҳаҭыртә шәҟәқәа ранашьан.