Аҟәа, ацәыргақәҵатә зал Хада аҟны еиҿкаан XVIII ашәышықәса анҵәамҭеи - XIX ашәышықәса алагамҭеи рзы Аԥсны аҳас иахагылаз Қьалашьбеи Чачба диижьҭеи 275-шықәса аҵра иазку ацәыргақәҵа. Ацәыргақәҵатә зал Хада аиҳабы Ельвира Арсалиа еизаз зегьы бзиала шәаабеит ҳәа раҳәауа иазгәалҭеит ицәыргоу аусумҭақәа ҭоурых шьаҭала ишеиқәыршәоу.
Уи аздырхиеит - аҭоурыхтә ҭҵаарадыррақәа ркандидат, адоцент, ААУ аҭоурыхтә факультет адекан Алик Габелиеи, аҭоурыхтә ҭҵаарадыррақәа ркандидат, Аԥсны аҭоурыхи, археологиеи, аетнологиеи акафедра арҵаҩы еиҳабы Џьамбул Инџьгиеи.
Аҭоурыхҭҵааҩ Џьамбул Инџьгиа имҩахыҵыз зегьы иҭабуп ҳәа раҳәауа иҳәеит: «Ацәыргақәҵа аиҿкаараҟны адгылара ҳарҭеит Аԥснытәи аҳәынҭқарратә университет анапхгара, хаҭала Алеко Алықьса-иԥа Гәарамиа, Аҟәа ақалакь Ахадара, ацәыргақәҵатә хала Хада аиҳабы Ельвира Анатоли-иԥҳа Арсалиа, С.Ҷанба ихьӡ зху адраматә театр анапхгара, Аԥсуа Ҳәынҭқарратә Аҿар ртеатр урҭ зегьы иахьатәи аусмҩаԥӷатә аҟны рџьабаа ҳадуп». Џьамбул Инџьгиа ҷыдала иазгәеиҭеит ацәыргақәҵаҟны иҿыцны ишалагалоу ҭырқәтәылантәи архьив аҟнытә адокументқәа. Аҵарауаҩ иажәақәа рыла урҭ аматериалқәа Аԥсны аҭоурых азы иҿыцуп.
Аҭоурыхтә ҭҵаарадыррақәа ркандидат, адоцент Сослан Салаҟаиа дахцәажәеит Аԥсны аҳас иахагылыз Қьалышьбеи Чачба Аԥсны аҭоурых аҟны иааникылоз аҭыԥ атәы.
Аԥсны Ахада иабжьгаҩ, Аԥсны акультура зҽаԥсазтәыз аусзуҩы Нугзар Логәуа иқәгылараҟны ирыдиниҳәалеит аҭоурыхҭҵааҩцәеи аҟазара знапы алакә ауааи иахьатәи крызҵазкуа амш, иҭабуп ҳәагьы реиҳәеит аиҿкааҩцәа.
Ашәҟыҩҩы, адраматург Анзор Мықәба иазгәеиҭеит иахьатәи аиқәшәара шҭоурыхтә хҭысу: «Қьалышьбеи Чачба иеиԥш иҟоу ауаа аҿар рзы иҿырԥшыгоуп, амилаҭ рзы иааӡагоуп», - ҳәа.
Аҭоурыхтә факультет адекан Алик Габелиа инаҵшьны иҭабуп ҳәа реиҳәеит иахьатәи ацәыргақәҵахь иааиз зегьы, ҷыдала дазааҭгылеит Аԥсны еиқәзырхаз афырхацәа рызқәа ҭыԥ ахьамадоу аҭыԥ аԥшаара азы даара хшыҩзышьҭрала аус шутәу, иазгәеиҭеит иара аԥшаара ахьаҭахыу аҭыԥгьы Аҟәатәи абааш аҟны шакәу.
Иазгәаҭатәуп, ацәыргақәҵа аиҿкааҩцәа машәыршақә шакәым иахьатәи арыцху шалырхыз – лаҵарамза 2 азы ауп аҳ Қьалышьбеи Чачба данҭадырхаз.
Ацәыргақәҵа рхы аладырхәит Аԥсны Ахәынҭқарра аминистрцәа, ауаажәларратә усзуҩцәа, ААУ апрофессор-рҵаҩратә еилазаара, акультуреи аҟазареи русзцҩцәа, аԥсуа интеллигенциа ахаҭарнакцәа.
Аусмҩаԥгатә аҳәаақәа ирҭакӡаны, еизаз идырбан С. Ҷанба ихьӡ зху аԥсуа драматә театр аҟны адраматург Анзор Мықәба Қьалышьбеи Чачба изкны иқәиргылаз аспектакль ацыԥҵәаха.
Ацәыргақәҵа аус ауеит лаҵарамза 6-нӡа, асааҭ 10 инаркны 17:00 нӡа.