ААУ аректор, академик Алеко Гәарамиа Санкт-Петербургтәи аҳәынҭқарратә университет аҵарауаа идикылеит. Аделегациа иалан: Санкт-Петербургтәи аҳәынҭқарратә университет жәларбжьаратәи аизыҟазаашьақәа афакультет адекан, апрофессор Ирина Новикова, Евразиатәи аҭҵаарадыррақәа р-Центр аиҳабы, аҭоурыхтә ҭҵаарадыррақәа рдоктор Александр Колесников, Санкт-Петербургтәи аҳәынҭқарратә университет арҵаҩы, аҭоурыхтә ҭҵаарадыррақәа ркандидат Залина Зокоева, ауниверситет 2-тәи акурс амагистрант Данила Москальчук.
ААУ аректор Алеко Гәарамиа аделегациа иалаз аҵарауаа ирзеиҭеиҳәеит ауниверситет жәларбжьаратәи аимадарақәеи аусеицурақәеи, ирыбжьоу аиқәшаҳаҭрақәеи ртәы. Ҷыдала иҳәеит, урыстәылатәи аҵараиурҭақәа, еиҳарак Москватәи аҳәынҭқаратә университет аректор Виктор Садовничи ибзоурала ҳастудентцәа рҵара ишацҵаз иуадаҩыз аибашьра ашьҭахьтәи ашықәсқәа раан.
Алеко Гәарамиа иазгәеиҭеит: "Аҵарадырра милаҭтә идеианы иҟалароуп, сгәы иаанагоит уи ахшыҩҵак ала ҳара ҳҿар аԥеиԥш лаша рзыԥшуп", - ҳәа.
Санкт-Петербургтәи аҳәынҭқарратә университет жәларбжьаратәи аизыҟазаашьақәа афакультет адекан, апрофессор Ирина Новикова илҳәеит ААУи Санкт-Петербургтәи ауниверситети ирыбжьоу аиқәшаҳаҭра аҳәаақәа ирҭакӡаны аҵарадырра ахырхарҭаҟны еиуеиԥшым ауснагӡатәқәа шазԥхьагәаҭоу: "Урҭ зегьы ҳара аҵарауаа апрактика аҟны ахархәара аҳҭароуп, иахьатәи аамҭа ҳасаб азуны иҿыцу апроектқәа алаҳгалароуп", - ҳәа.
Евразиатәи аҭҵаарадыррақәа р-Центр аиҳабы, аҭоурыхтә ҭҵаарадыррақәа рдоктор Александр Колесников иазгәеиҭеит ААУ аректор Алеко Гәарамиа иеиԥш зҵарадырра ҵаулоу аҵарауаҩ иҿцәажәареи, иԥышәеи рзыӡыррҩра дара рҵауирҭа аҵарауаа рзы ишгәахәа дуу. "Ҳара ҳзы даара краҵанакуеит иҳабжьоу аиқәшаҳаҭра аҳәаақәа ирҭакӡаны аусеицура", - иҳәеит ацентр аиҳабы.
Анаҩс, аиԥылара аусура иацҵан "Аԥсныи Урыстәылеи реизыҟазаашьақәа: иацы, иахьа, уаҵәы" ҳәа хыс измаз астол гьежь аҟны. Уи аартуа аректор Алеко Гәарамиа иҳәеит: "Иахьа ҳҵараиурҭа аҟны иныҳәа дууп, иҳазгәакьоу Санкт-Петербургтәи ауниверситет аҳаҭарнакцәа ҳҭааит". Аиԥылара аҳәаақәа ирҭакӡаны Аԥснытәи аҳәынҭкарратә университет аҵарауааи, Санкт-Петербургтәи аҳәынҭқарратә университет аҵарауааи ажәахәқәа ҟарҵеит:
апрофессор Ирина Новикова лажәахә азкын Санкт-Петербургтәи аҳәынҭқарратә университет жәларбжьаратәи аусура, аҭоурыхтә ҭҵаарадыррақәа ркандидат Залина Зокоева лажәахә азкын Урыстәылатәи-Аԥснытәи аимадара атема, СПб 2-тәи акурс амагистрант Данила Москальчук иажәахә аҟны еиҭеиҳәеит Санкт-Петербург аԥсуа диаспора аҭоурых ахыҵхырҭа, Евразиа аҭҵаарадыррақәа р-Центр аиҳабы, аҭоурыхтә ҭҵаарадыррақәа рдоктор Александр Колесников иажәахә аҟны иазгәеиҭеит ишаԥҵатәу Аԥсныи, Урыстәылеи, Ҭыркәтәылеи рҿар еидызкылаша Афорум.
Аԥснытәи аҳәынҭқарратә университет аҟынтә ажәахәқәа рыманы иқәгылеит ААУ ажурналистика акафедра аиҳабы, апрофессор Гәырам Амқәаб, ААУ аекономикатә теориа акафедра аиҳабы Александр Страничкин, ААУ афилософиа акафедра аиҳабы, апрофессор Иван Ҭарба, жәларбжьаратәи аизыҟазаашьақәа 3-тәи акурс астудент Ҭемыр Ԥлиа.
ААУ ажурналистика акафедра аиҳабы, аректор иабжьгаҩ Гәырам Амқәаб ажурналистика акафедра ахьӡала ажәалагала ҟаиҵеит урыстәылатәи архьивқәа рҟны ишҭҵаатәу Аԥсны ареволиуциа ҟалаанӡа иҭыҵуаз аҭыжьымҭақәа, насгьы убри аҭҵаара аԥсуа публицистика азы ишыцхыраагӡахо атәы.
Астол гьежь аусура рхы аладырхәит: Аԥсны аԥыза-министр ихаҭыԥуаҩ, афинансқәа рминистр Владимир Делба, Аԥсны Аҳәынҭқарра акультура аминистр Даур Ақаҩба, ААУ апрофессор-рҵаҩратә еилазаара, афакультетқәа рнапхгаҩцәа, астудентцәа.