Аԥснытәи аҳәынҭқарратә университет афакультетқәа рыбжьара имҩаԥысит аректор икубок агаразы ашьапылампыл маҷ аҟны аицлабра. Атурнир мҩаԥган Аԥсны ашьапылампыл Афедерациеи ААУ астудентцәа Реидгылеи рыдгыларала. Уи мҩаԥылгон Аспортклуб ахантәаҩы Инга Карчаа.

Аректор икубок азы еицлабуан афакультетқәа 8. Иазгәаҭатәуп, аицлабра мҩаԥысуеижьҭеи хымш шҵуа, мшаԥымза 4 инаркны 6-нӡа. Апедагогикатәи, азиндырратә, агронџьныртә, абиолого-географиатә афакультетқәа ркомандақәа афиналахь ицәырҵит. Ахԥатәи аҭыԥ аиуразы еиндаҭлон абиолого-географиатә факультети агронџьныртә факультети ркомандақәа. Актәи аҭып азы еиндаҭлоз апедагогикатә факультети азиндырратә факультети еиҭахарала еицасит. Анаҩс, 4:2 ҳәа (пенальти аҟны) аиааира ргеит апедагогикатә факульет акоманда, урҭ сынтәа ԥшьынтәуп аректор икубок азы аԥхьахә ргоижьҭеи. Аҩбатәи аҭыԥ ааннакылеит азиндырратә факультет акоманда, агронџьныртә факультет акоманда - ахԥатәи аҭыԥ.

Иреиӷьу амбахьчаҩ ҳәа дыԥхьаӡан апедагогикатә факультет (абаҩрҵәыра аҟәша) 1-тәи акурс астудент Николаи Езекелиан, иреиӷьыз ахәмарҩы ҳәа далкаан азиндырратә факультет - 3-тәи акурс астудент Осман Гәазаа.