Аԥснытәи аҳәынҭқарратә университет афилологиатә факультет аҟны имҩаԥысит Москватәи аԥсуа диаспора ахаҭарнакцәеи ААУ арҵаҩцәеи астудентцәеи реиԥылара. Аиԥылара хыс иаман: "Аԥсуа бызшәа аиқәырхара атәым ҳәынҭқарра аҟны инхо рзы".

Аусмҩаԥгатә иалахәын: афилологиатә факультет адекан Баҭал Хагәышь, ажурналистика акафедра арҵаҩы, апрофессор Екатерина Бебиа, аԥсуа бызшәа акафедра №1 аиҳабы Оҭар Ӡиӡариа, аԥсуа бызшәа акафедра №2 арҵаҩы Риҵа Сақаниа, агазеҭ «Аԥсуа университет» аредактор хада Алхас Чхамалиа, афилологиатә факультет астуденцәа, МАД ахеидкыла «Аламыс» ахаҭарнакцәа: Оҭар Ласариа, Виачеслав Мхонџьиа, Алеқсандр Быҭәба, Беслан Ақаҩба.

Аиԥылараан еиуеиԥшым азҵаарақәа рганахьала уи алахәылацәа агәаанагарақәа еибырҳәеит, аинтерес ззеицрымоу русурақәа рганахьала аинырра хра шамоу иалацәажәеит.  Адиаспора ахаҭарнакцәа еиҭарҳәеит аԥсҭазаара аҟнытә дара рхатә ԥышәа ҿырԥштәыс иааганы 50 шықәса инареиҳаны атәым жәҩан аҵаҟа рбызшәа аиқәырхара шрылшаз атәы. Аҿар ирабжьыргеит рхатәы бызшәа еиҷаҳаны игәцараркларц.

«Ас еиԥш иҟоу аиԥыларақәа  афилологиатә факультет еснагь ишатрадициоугьы, ҳазҭалаз аҵарашықәсбжа азы ари раԥхьатәиуп», - ҳәа азгәалҭеит аусмҩаԥгатә аиҿкааҩ Екатерина Бебиа.

Аиԥылара аҳәаақәа иртакӡаны, адиаспора ахаҭарнакцәа рхатәы бызшәа абеиара ашәақәа рыла игәылдырҭәааит.

Астуденцәеи адиаспора ахаҭарнакцәеи  реиқәшәара ахыркәшамҭазы ААУ апрофессор Екатерина Бебиа жәабран 21 иазгәарҭо апоезиа амш аҳаҭыраз, асасцәа аԥсуа шәҟәыҩҩцәа рҩымҭақәа ҳамҭас ирылҭеит.