Хәажәкыра 22 азы Аԥснытәи аҳәынҭқарратә университет жәларбжьаратәи аимадарақәеи аекономикатә зҵаарақәеи рыпроректор Даур Ақаҩбеи Санкт-Петербургтәи аҳәынҭқарратә университет жәларбжьаратәи аусқәа рзы аректор ихаҭыԥуаҩ Сергеи Андриушини рнапы аҵарҩит аҵараиурҭақәа рыбжьара аусеицуразы аиқәшәаҳаҭра. Аиқәшаҳаҭра аҳәаақәа ирҭакӡаны иалыршахоит аҭҵаареи аҵарадырреи аусхк аҟны аусеицуреи иреиҳау  арҵаратә программа аус аҟны аинырреи уҳәа арҵара иаҵанакуа  азҵаарақәа жәпакы аус рыдулара.  Аԥсны Аҳәынҭқарреи Урыстәылатәи Афедерациеи рыбжьара  аҵарадырра ахырхарҭала аусеицура аҵак ду шамоу шьақәырӷәӷәо,  аҩ-ганкгьы иазгәарҭеит ԥхьаҟагьы ари ахырхарҭала русура ишацҵахо.