Аԥснытәи аҳәынҭқарратә университет адоцент, афилологиатә ҭҵаарадыррақәа ркандидат Арда Ашәба ҿыц деиҭалхуп Д.И.Гәлиа ихьӡ зху Аԥсуаҭҵааратә институт аиҳабыс.

Маӡала имҩаԥгаз абжьыҭара алҵшәақәа рыла уи алахәылацәа 85-ҩык Арда Ашәба рыбжьы ирҭеит, 9-ҩык рыбжьы ирымҭеит.

2015 шықәса аахыс 2017 шықәсанӡа Арда Ашәба напхгара аиҭон ААУ афилологиатә факультет, 2017 шықәсазы раԥхьаӡа акәны Д.И.Гәлиа ихьӡ зху Аԥсуаҭҵааратә институт аиҳабыс далхын.

Арда Ашәба Аԥснытәи аҳәынҭқарратә университет аԥсуа литература акафедра аҟны 2005 шықәса аахыс иациҵоит ирҵаҩратә усура.