Аԥснытәи аҳәынҭқарратә университет аҟны имҩаԥысит ДЖӘР, ЛЖӘР, Аахыҵ Уаԥстәыла, Урыстәыла астуденттә еиҿкаарақәа рыбжьара   «Донбасс геноцидда» ҳәа хыс измаз аконференциа. Уи мҩаԥган онлаинла, аплатформа ZOOM аҟны.

Аԥснытәи аҳәынҭқарратә университет аганахьала аконференциа рхы аладырхәит ААУ жәларбжьаратәи аимадарақәеи аекономикатә зҵаарақәеи рыпроректор Даур Ақаҩба, аҭоурыхтә факультет адекан Алик Габелиа, аҭоурыхтә факультет астудентцәеи ААУ астудентцәа Реидгыла ахаҭарнакцәеи.

Аконференциа аҟны иалацәажәан шықәсырацәала ДЖӘР, ЛЖӘР рҟны имҩаԥысуаз ахҭысқәа ртәы. Иара убас иахцәажәан Украина имҩаԥысуа ахҭысқәа.

Аконференциа аҟны иазԥхьагәаҭаз астол гьежь аҳәаақәа ирҭакӡаны, аибашьра аанкыларазы ООН иазырхоу арезолиуциа анапаҵаҩра мҩаԥган.

ААУ астудентцәа Реидгыла ахаҭарнакцәа ЛЖӘР, ДЖӘР иқәынхо ирзеиӷьаршьеит ачҳареи аҭычреи.

Аконференциа ахыркәшамҭазы, уи алахәылацәа еибырҳәеит ԥхьаҟагьы ауниверситетқәа рыбжьара аусеицура ишацҵахо.