Аԥснытәи аҳәынҭқарратә университет аҭоурыхтә факультет аҟны имҩаԥысит аҵарауаҩ Владимир Захарови Мақсим Васькови еицырҩыз "Аԥсныи Аладатәи Уаԥстәылеи Аҳәынҭқаррақәа рхьыԥшымра аполитикатәии азинтәии шьаҭақәа» ҳәа хьӡыс измаз ашәҟәы апрезентациа. Ашәҟәы авторцәа руаӡәк аҭоурыхтә ҭҵаарадыррақәа рдоктор, апрофессор, "Ахьӡ-Аԥша" аорден занашьоу Владимир Захаров ааигәа иԥсҭазаара далҵит.

Аҭоурыхтә факультет арҵаҩцәеи астудентцәеи асоциологиатә ҭҵаарадыррақәа рдоктор, апрофессор Мақсим Васькови еиԥылаанӡа, уи дидикылеит ААУ аректор, академик Алеко Гәарамиа. Аректор иазгәеиҭеит аҵараиурҭаҟны ааигәа имҩаԥысраны иҟоу аконференциақәа аҭоурыхҭҵааҩ Владимир Захаров игәалашәара ишазкхо.

Аиԥылара ахыркәшамҭаз аҵарауаҩ аректор ҳамҭас ииҭеит Владимир Захаров инапала иҩыз Алеко Гәарамиа изырхоу азеиӷьашьара зну ари ашәҟәы.

Анаҩс, имҩаԥысит апрофессор Мақсим Васькови аҭоурыхтә факультет арҵаҩцәеи астуденттцәеи реиԥылара. Уи рхы аладырхәит ААУ жәларбжьратәи аимадарақәеи аекономикатә зҵаарақәеи рыпроректор Даур Ақаҩба, аҭоурыхтә факультет адекан Алик Габелиа, аректор ицхырааҩ Анжела Қаџьаиа, аҭоурыхтә ҭҵаарадыррақәа рдоктор Аслан Аҩӡба, аҭоурыхтә ҭҵаарадыррақәа ркандидат Сослан Салаҟаиа, аҭоурыхтә факультет адекан ихаҭыԥуаҩ Виктор Аҩӡба, астудентцәа.

Аиԥылараҟны аҵарауаҩ Мақсим Васьков инарҭбааны еиҭеиҳәеит ашәҟәы ахықәкы хада. Владимир Захаров хаҭала дыздыруаз аҭоурыхтә факультет арҵаҩцәа иазгәарҭеит ашәҟәы аҭҵаарадырратә ҵакы инаҷыданы аполитикатә ҟазшьа шамоугьы, Аԥсны аҭагылазаашьа аиӷьтәра иазааԥсоз аҵарауаа ирыбзоураны иазхаҵан ахьыԥшымра ҳәа агәаанагара аадырԥшит аҭоурыҭҵааҩцәа.

Мақсим Васьков иҭабуп ҳәа иеиҳәеит ашәҟәы аҭыжьра аҟны ацхыраара ҟазҵаз Аԥсны Аҳәынҭқарра Адәныҟатәи ау́сқәа ԥыхьатәи аминистр, ААУ жәларбжьаратәи аимадаракәеи аекономикатә зҵаарақәеи рыпроректор Даур Ақаҩба.