Аԥснытәи аҳәынҭқарратә университет аҟны имҩаԥысит урыстәылатәи аполитолог, евро-атлантикатә шәарҭадара аҭҵаарадыратә Центри жәларбжьаратәи Аинститут аҭҵаарадырратә усзуҩи, Урыстәыла ажурналистцәа Реидгыла алахәыла, ажурнал «Жәларбжьаратәи аналитика» аредактор хада Сергеи Маркедонов иԥылара.

Аусмҩаԥгатә еиҿыркааит Аԥсны ажурналистцәа Реидгылеи жәларбжьаратәи амедиаклуб "Формат А3".  

Аполитологи  астудентцәеи еиԥылаанӡа, уи ААУ аректор, академик Алеко Гәарамиа дидикылеит. Аректор иазгәеиҭеит, асеиԥш иҟоу аиԥыларақәа аусутә ҟазшьа шрымоу, хра злоу азҵаарақәа рылацәажәара шалдыршо.  Аиԥылараҟны ахцәажәара роуит аполитика аҟны имҩаԥысуа актуалра зҵоу ажәабжьқәа жәпакы. 

Аиԥылара рхы аладырхәит ателеканал «Абаза-ТВ» аиҳабы Руслан Ҳашыг , Аԥсуа-абаза Конгресс Иреиҳау Ахеилак алахәыла Беслан Кобахьиа,  Аҧсны Аҳәынҭқарра Ашәарҭадара ахеилак амаӡаныҟәгаҩ Сергеи Шамба, ААУ жәларбжьаратәи аизыҟазаашьақәеи аекономикатә зҵаарақәеи рыпроректор Даур Ақаҩба, ААУ ажурналистика акафедра аиҳабы,  аректор иабжьгаҩ Гәырам Амқәаб, азиндырратә факультет адекан Сергеи Смыр,  аректор ицхырааҩ Анжела Қаџьаиа.

Аиԥылара аофициалтә хәҭа ахыркәшамҭаз аполитолог Сергеи Мирослав-иԥа Аԥснытәи аҳәынҭқарратә университет ахьӡала агәаларшәагатә  ҳамҭақәа ианашьан.

Анаҩс аполитолог Сергеи Маркедонов ААУ астудентцәеи, арҵаҩцәеи, Аԥсны амассатә хархәагәақәа русзуҩцәеи рзы «Аԥсныи урыстәылатәии-аԥснытәии еизыҟазаашьақәа Кавказ агеополитикатә контекст ала» ҳәа хьӡыс измаз алекциа мҩаԥигеит. Уи аҳәаақәа ирҭакӡаны астудентцәа алшара рыман аполитолог иахь азҵаараҭара.

Иазгәаҭатәуп, Сергеи Мирослав-иԥа иусумҭақәа жәпакы Аԥсныи Урыстәылеи реизыҟазаашьақәа ишырзикхьоу.

Аиԥылара ахыркәшамҭаз ААУ арҵаҩцәеи астудентцәеи аполитолог иҭабуп ҳәа иарҳәеит аинтерес ду зҵаз алекциа азы.