Аԥснытәи аҳәынҭқарратә университет аҟны имҩаԥсит изаамҭанытәиу аректорат аилатәара.  Уи напхгара аиҭон ААУ аректор, академик Алеко Гәарамиа, иара убас аректорат рхы аладырхәит аҵараиурҭа апроректорцәа, афакультетқәа рдеканцәа, ААУ аструктуратә ҟәшақәа рнапхгаҩцәа. Амшхәаԥштә азҵаарақәа ирхадаран аепидемиологиатә ҭагылазаашьеи, аӡынтәи аԥышәаратә сессиа  алҵшәақәеи, аҩбатәи асеместр алагамҭеи, аԥышәарақәа реиҭаҭареи ирыҵаркуа аусқәа.

Афакультетқәа рнапхгаҩцәа инарҭбааны еиҭарҳәеит аҵаратә шықәса аҩныҵҟа астудентцәа реихьӡарақәеи, аӡынтәи асессиа алҵшәақәеи, аԥышәарақәа реиҭаҭареи ирыҵаркуа аусхкқәа жәпакы ртәы.

Аректорат аҟны ҷыдала иазгәаҭан, ҳазҭалаз ашықәс азы аҵараиурҭа аҟны иазԥхьагәаҭоу аусмҩаԥгатәқәа зегьы  ААУ аиубилеитә рыцхә  - 90 шықәса ахыҵра ишадҳәалахо.