62 шықәса дшырҭагылаз лыԥсҭазаара далҵит зыхьӡ нагоу аԥсуа фольклорист, аҭҵаарадырратә усзуҩы еиҳабы, Д. И. Гәлиа ихьӡ зху Аԥсуаҭҵааратә институт афольклор аҟәша аиҳабы, Аԥснытәи аҳәынҭқарратә университет аԥсуа литература акафедра адоцент, С. А. Сосналиев ихьӡ зху "Аԥсны Афырԥҳәыс" ҳәа амедаль занашьоу Цира Смаил-иԥҳа Габниа.

Цира Смаил-иԥҳа 30-шықәса инареиҳаны аус луан Аԥснытәи аҳәынҭқарратә университет аҟны. Аԥсуа литература акафедра аҟны аԥсуа фольклори алитературеи рхырхарҭала азеиԥши иҷыдоуи акурсқәа мҩаԥылгон. Ари аамҭа иалакӡаны аҵарауаҩ лнапы иҵлыжьхьан хыԥхьаӡара рацәала аҭҵаарадырратә усумҭақәа.

Аҵарауаҩ лааԥсареи ллагалеи рацәоуп аԥсуа мифологиа аҭҵаара аус аҟны. Цира Смаил-иԥҳа давторуп раԥхьаӡатәи    аԥсуа фольклор аҟны имаҷу ажанрқәа ҭызҵаауа монографиатә шьаҭала иҭҵаау академиатә ҭыжьымҭа - Аԥсуа мифқәеи алегендақәеи реизга. Афольклори алитературеи рзанааҭ ала Адиссертациатә Хеилак далахәылан.

Аԥснытәи аҳәынҭқарратә университет аректорати, апрофессор-рҵаҩратә еилазаареи, арҵаҩцәеи, астудентцәеи гәалсра дула ирыдышшылоит Цира Смаил-иԥҳа лҭаацәеи, лыуацәеи, лҭынхацәеи.

Аҵарауаҩ, арҵаҩы Цира Смаил-иԥҳа лгәалашәара лаша лааӡамҭацәеи, лколлегацәеи, дыздыруаз зегьы ҳгәаҵаҟны наӡаӡа иаанхоит.