Аԥснытәи аҳәынҭқарратә университет аҟны имҩаԥысит аҭоурыхтә факультет Урыстәылеи аҳәаанырцәтәи аҳәынҭқаррақәеи рҭоурых арҵаҩы Илона Агрба аҭоурыхтә ҭҵаарадыррақәа ркандидат иҩаӡара ахьӡ аиуразы лдиссертациа ахьчара.

Азанааҭ - Аԥсны аҭоурых.

Атема: «Общественно-политическая деятельность абхазской интеллигенции в 1917-1921 гг.».

Адиссертациатә усумҭа напхгара арҭон - аҭ. ҭҵ. рд., апроф. Кәыпраа А.Е, аҭ. ҭҵ. рд., апроф. Аҩӡба А.Ф.;

Аоппонентцәа: аҭоурыхтә ҭҵ. рдоктор, апроф. Анчабаӡе И.Д., аҭоурыхтә ҭҵ. рканд., апроф. Лакоба С.З.

Адиссертациатә Хеилак аилазаара:

Ахантәаҩы - аҭ. ҭҵ. рд., апроф. Бӷажәба О. Хә.;

Ахантәаҩы ихаҭыԥуаҩ аҭ. ҭҵ. рд., апроф. Шамба С.М.;

Амаӡаныҟәгаҩ – афилософ. ҭҵ. рканд., адоц. Кәыҵниа М.Б.;

Аҭ. ҭҵ. рд., апроф. – Бигәаа В.Л.;

Аҭ. ҭҵ. рд., апроф. - Маан О. В.;

Аҭ. ҭҵ. рканд., апроф. - Лакоба С. З.;

Аҭ. ҭҵ. рканд., адоц. - Салаҟаиа С. Ш.;

Аҭ. ҭҵ. рканд., адоц. - Кациа Р. Н.

Аҭ. ҭҵ. рканд., адоц. - Гәыргәылиа Е. А.;

Аҭ.ҭҵ. рд., апроф. - Криучков И.В. (Ставрополь);

Аҭ. ҭҵ. рканд., адоц. - Габелиа А. Н.

Адиссертант Илона Всеволод-иԥҳа лажәахә аҟны еиҭалҳәеит лусумҭа ахықәкы хадеи, аҵаки, аҭҵаарадырратә ҿыцрақәеи, лхатәы лкаақәеи, аартрақәеи ртәы.

Адиссертациатә Хеилак алахәылацәа иазгәарҭеит адиисертациатә усумҭа ахьчара Аԥснытәи аҳәынҭқарратә университети аҭоурыхтә факультети рзы аҵак ду шамоу. Аҵарауаа ргәанагарала аусумҭа аҭҵаара ганрацәала дазнеит адиссертант. Ишьҭыху атема лара лаԥхьаҟа аус азызухьаз рџьабаа ахә ҳаракны илшьеит Илона Агрба лықәгылара аҟны. Иҟан зҵаарақәак адиссертант аиҭахәаԥшреи аиҭазхәыцреи ахьаалырԥшыз. Иазгәаҭан, Илона Агрба лхы ишалырхәаз Аԥсны аҭоурых аҟны акьыԥхь зымбац архьивтә материалқәа. Уи алагьы илырбеиеит аҭоурыхтә хыҵхырҭақәа ҳәа азгәарҭеит аоппонентцәа.

Агрба Илона Всеволод-иԥҳа лдиссертациа иазкны абжьыҭара имҩаԥгаз алҵшәақәа рыла, Адиссертациатә Хеилак алахәылацәа зегьы еицҿакны уи аҭоурыхтә ҭҵаарадыррақәа ркандидат ҳәа ахьӡ лоура иазыразхеит.