Аԥснытәи аҳәынҭқарратә университет аҟны имҩаԥсит ҳазҭалаз ашықәс азы раԥхьатәи аректорат аилатәара. Уи онлаинла ихы алаирхәит ААУ  аҵараус актәи апроректор, апрофессор Виқтор Маланӡиа.  Амшхәаԥштә азҵаарақәа ирхадаран аепидемиологиатә ҭагылазаашьеи, аӡынтәи аԥышәаратә сессиа заанаҵтәи алҵшәақәеи, ҳазҭалаз 2022-тәи ашықәс  аҩныҵҟа аҵараиурҭа аҟны иазԥхьагәаҭоу асумҩаԥгатәқәа реиҿкаареи рымҩаԥгареи ирыдҳәалоу азҵаарақәа жәпакы. Аректорат аҟны ахцәажәара зауз аусхкқәа хымԥадатәиқәан ԥхьаҟатәи аҵаратә процесс иаҵанакуа аихшанҵа ашьақәыргыларазы.  Ҷыдала ахцәажәара аиуит сынтәа ААУ аиубилеитә рыцхә – 90 шықәса ахыҵра иазку аиҿкаара иадҳәалоу азҵаара.

Афакультетқәа рнапхгаҩцәа инарҭбааны еиҭарҳәеит аҵаратә шықәса аҩныҵҟа астудентцәа реихьӡарақәеи, аӡынтәи асессиа алҵшәақәеи, аԥышәарақәа реиҭаҭареи ирыҵаркуа аусқәа. Иара убас, ахцәажәара аиуит  афакультетқәа рҟны ичмазаҩу арҵаҩцәеи астудентцәеи русуреи рҵареи атәы, адеканцәа излазгәарҭаз ала, иҳаҩсыз амзқәа ирҿырԥшны иугозар ичмазҩу (COVID-19  зыхьуа) рхыԥхьаӡара еиҳа еиҵоуп.  Аректорат алахәылацәа алацәажәеит аихшьаалатә аттестацеиеи, аԥхынтәи аԥышәаҭареи, аҳәынҭқарратә ԥышәаҭареи, асесиақәеи, адиссертациатә усумҭақәа разԥхьахьчарақәеи рыплан.