Ԥхынҷкәын 21 азы ААУ жәларбжьаратәи аимадарақәеи  аекономикатә зҵаарақәеи рыпроректор Даур Ақаҩбеи Санкт-Петербургтәи аҳәынҭқарратә университет жәларбжьаратәи аусқәа рзы аректор ихаҭыԥуаҩ Сергеи Андриушини еиԥылеит.
Аиԥыларҟны ирылацәажәан Аԥснытәи аҳәынҭқарратә университети Санкт-Петербургтәи аҳәынҭқарратә университети русеицура аԥеиԥши аҿиареи рызҵаарақәа жәпакы. «́Ҳҵараиурҭа иамоуп аҭагылазаашьа  Санкт-Петербургтәи ауниверситет  имҩаԥнаго еиуеиԥшым апрограммақәеи онлаин платформақәеи рҟны рыҽрылархәра. Ҳара ҳганахьалагьы ҳгәы иҭоуп аинтерес зҵоу апрограммақәа реиҿкаареи рымҩаԥгареи. Арҭқәа зегьы хымԥада арҵареи аҭҵаареи знапы алаку аҿар рзы ицхыраагӡа дупп», - ҳәа азгәеиҭеит ԥхынҷкәын 20 аахижьҭеи усуратә визитла Санкт-Петербрг иҟоу Даур Ақаҩба.