Ԥхынҷкәын 21 азы ААУ жәларбжьаратәи аимадарақәеи аекономикатә зҵаарақәеи рыпроректор Даур Ақаҩба диԥылеит Санкт-Петербургтәи аҳәынҭқарратә аекономикатә  университет аректор Игор Мақсимцев.

Аиԥылараҟны иӡбан 2015 шықәсазы Аԥснытәи аҳәынҭқарратә университети Санкт-Петербургтәи аҳәынҭқарратә аеконимикатә университети рыбжьара ибжьаҵаз аиқәшаҳаҭра ацҵара. Уи аҳәаақәа ирҭакӡаны иазԥхьагәаҭоуп СПбГЭУ аҵарауаа ААУ астуденцәа рзы  алекциақәа раԥхьареи, астуденттә практикақәа  Санкт-Петербург рахысреи, ААУ аҟны иҟам  ахырхарҭақәа рыла амагистратура аҭалареи  уҳәа азҵааарақәа жәпакы.

«Иҿыцу аиқәшаҳаҭрақәа иҳарҭоит алшара ААУ апрофессор-рҵаҩратә еилазаара  Санкт-Петербургтәи аҳәынҭқарратә аекономикатә университет аҟны рԥышәеизырҳара. Уи инаҷыданы СПбГЭУ иҭнажьуа алитература-методикатә хархәагақәа рыла ҳҵараиурҭа еиқәдыршәоит. Аиԥылара мҩаԥысит аҩ-ҵараиурҭак рзы хра аланы, ҳусеицура аҵарадырра аҩаӡара аизырҳара ианымԥшыр залшом», - ҳәа азгәеиҭеит ААУ жәларбжьаратәи аимадарақәеи аекономикатә зҵаарақәеи рыпроректор Даур Ақаҩба.