Ԥхынҷкәын 17 азы ААУ жәларбжьаратәи аимадарақәеи аекономикатә зҵаарақәеи рыпроректор Даур Ақаҩба диԥылеит Москаватәи аҳәынҭқарратә акультура аинститут (МГИК) амедиакоммуникациеи аудиовизуалтә ҟазареи афакультет адекан Иури Кот.
 Аиԥылараҟны  иалацәажәан Москаватәи аҳәынҭқарратә акультура аинститути Аԥснытәи аҳәынҭқарратә университети ирыбжьоу  аиқәшаҳаҭра аҳәаақәа ирҭакӡаны ԥхьаҟатәи аусеицура. Иазгәаҭатәуп амедиакоммуникациеи аудиовизуалтә ҟазареи афакультет адекан Иури Кот ааигәа МГИК аҵараиурҭа ахьӡала  «Аиқәшаҳаҭра» анапы аҵаҩразы ААУ дшаҭааз.
«Иахьатәи аамҭазы амассатә-информациатә хархәагақәеи, амедиокоммуникациеи  ауаҩы иԥсҭазаара иахәҭакны иҟоуп. Амедиокоммуникациеи ажурналистикеи рхырхарҭаҟны иҿыцу атеоретикатәии апрактикатәии дыррақәа Аԥсны Аҳәынҭқарра аҟнгьы ихымаԥадатәиуп.  Убри ауп хықәкыла ҳусеицура ззырхоу», - ҳәа азгәеиҭеит усуратә визитла  Москва иҟоу Даур Ақаҩба.