ААУ аҟны имҩаԥысит Аԥсны Аҳәынҭқарраҟны аԥсуа бызшәеи алитературеи дзырҵо абжьаратә школқәа рырҵаҩцәа рԥышәеизырҳаразы акурсқәа реихшьаала.  Уи еиҿкаан  Аԥснытәи аҳәынҭқарратә университет аҟны иаԥҵоу аквалификациа  аизырҳареи аспециалисттцәа реиҭазыҟаҵареи ирызку Ареспубликатә центри, Аԥсны Аҵареи абызшәатә политикеи рминистрреи раԥшьгарала.
Рыквалификациа  аизырҳаразы акурсқәа рахь ааԥхьара рыман: ақ. Аҟәа, Гагра, Аҟәатәи  араионқәа, алицеи-интернатқәа, насгьы иаԥсыуам ашколқәа  рҟынтәи арҵаҩцәа. Зынӡа аԥышәеизырҳара рхы аладырхәит 56-ҩык арҵаҩцәа. Акурсқәа мҩаԥган алекциақәеи, аиҿцәажәарақәеи, атренингқәеи рформала.
Аусмҩаԥгатә рхы аладырхәит ААУ апрофессор-рҵаҩратә еилазаареи, Аԥсны  Аҵареи абызшәатә политикеи рминистрра аспециалистцәеи аметодистцәеи, Аԥсны абжьаратә школқәа рырҵаҩцәеи.
Акфалификациа аизырҳара иахысыз арҵаҩцәа зегьы иҭабуп ҳа рарҳәеит ААУ апрофессор-рҵаҩратә еилазаареи анпхгареи, хаҭала а́џьа рыдызбалаз аҵараиурҭа арҵаҩцәа.  Иазгәарҭеит ауниверситет дара зааӡаз адыррақәа рызҭаз, рзанааҭ ауасхыр азышьҭазҵаз хәышҭаароуп ҳәа.
Иазгәаҭатәуп 2-мчыбжьы инарзынаԥшуа имҩаԥысуаз акурсқәа рҟны қәҿиарала зхы алазырхәыз арҵаҩцәа ишранашьаз аҳаҭыршә́ҟәқәа.
ААУ аҟны иаԥҵоу аквалификациа  аизырҳареи аспециалисттцәа реиҭазыҟаҵареи ирызку Ареспубликатә центр анапхгаҩы Медеиа Ченгьелиа ҷыдала иҭабуп ҳәа ралҳәеит аҵараиурҭа арҵаҩцәа, лымкаала ААУ аректор, академик Алеко Гәарамиа акурсқәа реиҿкаара аус аҟны иҟаиҵаз адгылареи ахылаԥшреи рзы.
Ҳазҭало Ашықәс ́ҿыц рыдныҳәалауа  Медеиа Ченгьелиа арҵаҩцәа зегьы Аԥснытәи аҳәынҭқарратә университет ахьӡала агәаларшәагатә ҳамҭақәа рылҭеит.