Аԥснытәи аҳәынҭқарратә университет аҟны аусура иалагеит Аԥсны Аҳәынҭқарраҟны аурыс бызшәеи алитературеи дзырҵо абжьаратә школқәа рырҵаҩцәа рԥышәеизырҳаразы акурсқәа. Уи еиҿыркааит Аԥсны иҟоу "Россотрудничество" Ахаҭарнакреи, Аԥснытәи аҳәынҭқарратә университет аҟны иаԥҵоу аквалификациа аизырҳареи аспециалистцәа реиҭазыҟаҵареи ирызку Ареспубликатә центри, Аԥсны Аҵареи абызшәатә политикеи рминистрреи.

Аквалификациа аизырҳара иазку акурсқәа русура ахь ииасаанӡа аусмҩаԥгатә аиҿкааҩцәа идикылеит Аԥснытәи аҳәынҭқарратә университет жәларбжьаратәи аимадарақәеи аекономикатә зҵаарақәеи рыпроректор Даур Ақаҩба. Аиԥылараҟны иалацәажәан аурыс бызшәеи алитературеи рхырхарҭаҟны азҵаарақәа жәпакы. Даур Ақаҩба иажәақәа рҟны иазгәеиҭеит ҳҵараиурҭа еснагь ишазыхиоу ҳаамҭазтәи аметодикақәа рԥышәа аимдаразы акурқәа реиҿкаареи рымҩаԥгареи.

Акурсқәа раартраҿы аԥхьажәақәа рыманы иқәгылеит Аԥсны Аҵареи абызшәатә политикеи рминистр актәи ихаҭыԥуаҩ Ада Кәарҷелиа, Аԥсны иҟоу "Россотрудничество" ахаҭарнак Наталиа Каиун, ААУ аҟны иаԥҵоу аквалификациа аизырҳареи аспециалистцәа реиҭазыҟаҵареи ирызку Ареспубликатә центр аиҳабы Медеиа Ченгьелиа, аурыс бызшәеи алитературеи ркурсқәа рмодератор, афил.ҭҵ. рканд., адоцент, А.С. Пушкин ихьӡ зху аурыс бызшәа Аҳәынҭқарратә институт адунеитә литература акафедра аиҳабы Александр Пашков.

Анаҩс Аԥсны аурыс бызшәеи алитературеи дзырҵо рырҵаҩцәа рзы Аԥснытәи аҳәынҭқарратә университети Урыстәылатәи аҳәынҭқарратә университетқәа рҟынтәи аҵарауаа имҩаԥыргеит аурыс бызшәеи алитературеи аметодика аҷыдара аазырԥшуаз алекциақәа.

Иазгәаҭатәуп ас еиԥш иҟоу арҵаҩцәа рыквалификациа аизырҳаразы акурсқәа еиуеиԥшым азанааҭқәа рыла есышықәса ААУ ацентр ишымҩаԥнаго. Иахьазы аԥышәеизырҳара акурсқәа рхы рыладырхәит 54-ҩык аурыс бызшәеи алитературеи абжьаратә школқәа рырҵаҩцәа.

Иахьа зусура хацзаркыз акурсқәа хыркәшахоит ԥхынҷкәын 14 азы.