Лыԥсҭазаара далҵит ААУ апедагогикеи аԥсихологиеи ркафедра аиҳабы, апедагогикатә ҭҵаарадыррақәа ркандидат, адоцент, Аҧсны Иреиҳау ашкол зҽаҧсазтәыз аусзуҩы, Аԥсны Аџьынџьтәылатә еибашьра аветеран, Аԥсны жәлар Рфорум «Аидгылара» алахәыла, "Аԥсны хатәгәаԥхарала еибашьуаз Реидгыла" амедаль занашьоу Нанули Тонта-иԥҳа Лакашьиа.

Нанули Тонта-иԥҳа 40-шықәса инареиҳаны аус луан Аԥснытәи аҳәынҭқарратә университет аҟны. Ари аамҭа иалакӡаны аҵарауаҩ лнапы иҵлыжьхьан 25-инареиҳаны аҭҵаарадырра-методикатә усумҭақәа. Нанули Тонта-иԥҳа иҭылҵаауаз ахырхарҭақәа рымҿхак ҭбаан, урҭ рахь иаҵанакуеит аԥсуа милаҭтә педагогика аҷыдарақәеи атрадициақәеи. Нанули Лакашьиа адиссертациа́қәа зыхьчоз рхеилак аҟны аҵарауаҩ-маӡаныҟәгаҩс дыҟан анаҩстәи азанааҭқәа рыла: "Азеиԥш педагогика аҭоурыхи ашьақәгылареи", "Арҵара атеориеи аметодикеи ааӡараҟны".

Аҵарауаҩ лааԥсареи ллагалеи рацәоуп аԥсуа рҵаҩцәа апатриотизми рзанааҭтә ус агәыбылреи дыркра аус аҟны.

Аԥснытәи аҳәынҭқарратә универсиет аректорати, апрофессор-рҵаҩратә еилазаареи, арҵаҩцәеи, астудентцәеи гәалсра дула ирыдышшылоит Нанули Тонта-иԥҳа лҭаацәеи, лыуацәеи, лҭынхацәеи.

Аҵарауаҩ, арҵаҩы Нанули Тонта-иԥҳа лгәалашәара лаша лааӡамҭацәеи, лколлегацәеи, дыздыруаз зегьы ҳгәаҵаҟны наӡаӡа иаанхоит.