Аԥснытәи аҳәынҭқарратә университет аҟны имҩаԥысуеит аԥсуа бызшәеи алитературеи арҵаҩцәа рыквалификациа аизырҳаразы акурсқәа.

Акурсқәа еиҿкаауп Аԥснытәи аҳәынҭқарратә университет аҟны иҟоу аквалификациа аизырҳареи акадрқәа реиҭазыҟаҵареи рцентри Аԥсны Аҳәынҭқарра Аҵареи абызшәатә политикеи рминистрреи раԥшьгарала.

Акурсқәа мҩаԥыслоит ԥхынҷкәын 6 инаркны 17-нӡа.

Ашьақәыргыларатә сессиа ахь ааԥхьара рыман: ақ. Аҟәа, Гагра, Гәдоуҭа, Аҟәатәи араионқәа, иара убас хаҭала Аԥсны Аҳәынҭқарра Аҵареи абызшәатә политикеи рминистрра ирыҵанакуа ашколқәеи алицеи-интернатқәеи, насгьы иаԥсыуам ашколқәа рҟынтәи арҵаҩцәа. Акурсқәа рыҽрыладырхәит зынӡа 56-ҩык арҵаҩцәа. Урҭ рҽыршоит ҩ-гәыԥкны: 1) аԥсуа бызшәеи алитературеи дзырҵо агәыԥ; 2) аԥсуа бызшәа иаԥсыуам ашколқәа рырҵаҩцәа ргәыԥ. Ишьақәырӷәӷәан арҵаратә план апрограмма, убри инақәыршәаны еиқәыршәан алекциақәа реихшанҵа. Акурсқәа мҩаԥгахоит алекциақәеи, аиҿцәажәарақәеи, атренингқәеи рформала. Ашьақәыргыларатә сессиа иахысыз рзы ихымԥадатәины иҟоуп ареферат, уи ҽҳәарас иамоуп жәабранмза 18-нӡа 2022ш.

Аԥснытәи аҳәынҭқарратә университет аҟны иҟоу аквалификациа аизырҳареи акадрқәа реиҭазыҟаҵареи рцентр анапхгаҩы Медеиа Ченгелиа лажәақәа рҟны илҳәеит: "Иахьа ҳара ҳаиқәшәара ААУ аҟны машәыршақә иҟамлеит. Ари ахәышҭаара аҭоурых ду змоу, арҵаҩцәа дуқәа абиԥарала еиҵазааӡахьоу хәышҭаароуп. Аҵарауаа зегьы еидызкыло ҳҵараиурҭа ауп" -, ҳәа. Акурсқәа русура атәы дахцәажәауа иазгәалҭеит, қәҿиарала ихзыркәшаз, адҵақәа зегьы назыгӡаз ишрыҭахо аквалификациа аизырҳара зырҵабыргуа "Аршаҳаҭга".

ААУ аԥсуа филологиатә факултьтет адекан Баҭал Хагәышь иазгәеиҭеит аԥсуа бызшәеи алитературеи ашколқәеи аҵараиурҭақәеи рҟны апрограмма асааҭқәа реиҭахәаԥшра шаҭаху. Игәаанагара ала, аԥсуа бызшәа амш ҳәа ҽнак алкаара аҭахым, уи еснагь арҿиареи арцыхцыхреи ауп иззаԥсатәу. Насгьы аҵак ду змоу акакәны дахәаԥшуеит абызшәа мацара арҵара акәымкәа аԥсуара ахаҭа рылааӡара: "Аԥсуара ыҟамкуа, абызшәа мацара апроблема ҳзыӡбаӡом", - иҳәеит адекан. Аҵарауаҩ иажәақәа рыла, аԥсуа бызшәа азҵаара аӡбара аус аҿы ацхыраара ҟанаҵар ауп аҳәынҭқарра ахадара.

Аԥсны Аҳәынҭқарра Аҵареи абызшәатә политикеи аминистр актәи ихаҭыԥуаҩ Ада Кәарҷелиа иазгәалҭеит аиԥылара зҽалазырхәыз рҿаԥхьа иқәгылоу зҵаара хаданы ишыҟоу аҵара ахаҭабзиара ашьҭыхра аус.

Асекциатә усура иалагаанӡа еизаз идырбан аҵараиурҭа аҭоурых аазырԥшуаз ААУ 85-шықәса ахыҵра аҳаҭыраз иҭыхыз афильм. Анаҩс аусмҩаԥгатә аиҿкааҩцәа разԥхьагәаҭарала акурсқәа рзыӡырҩцәа еихшан секциала.

Аусмҩаԥгатә рхы аладырхәит ААУ апрофессор-рҵаҩратә еилазаареи, Аԥсны Аҳәынҭқарра Аҵареи абызшәатә политикеи аминистрра аспециалистцәеи, Аԥсны ашколқәа рырҵаҩцәеи.