Аԥснытәи аҳәынҭқарратә университет аҟны имҩаԥысит М. С.́ Шьепкин ихьӡ зху Иреиҳау атеатралтә училишье аректор, (ГИТИС) аурыс театр аҭоурых акафедра аиҳабы, Урыстәылатәи Атеатр Маҷ асахьаркыратә напхгаҩы ихаҭыԥуаҩ, Урыстәыла аҟазара зҽаԥсазтәыз аусзуҩы Борис Лиубимов иԥылара.
Аусмҩаԥгатә еиҿыркааит Аԥсны ажурналистцәа Реидгылеи жәларбжьаратәи амедиаклуб "Формат А3". Иазгәаҭатәуп, урҭ изныкымкәа Аԥсныҟа ишаарыԥхьахьоу зыхьӡ нагоу аполитикцәеи, ажурналистцәеи, ауаажәларратә усзуҩцәеи.
Борис Лиубимови астудентцәеи еиԥылаанӡа, ААУ аректор, академик Алеко Гәарамиа дидикылеит. Аректор иазгәеиҭеит ҳаԥсадгьыли ҳҵараиурҭеи аамҭа уадаҩқәа шырхыргахьоугьы, аҿиара амҩа ҳақәуп ҳәа. Аԥсны Аџьынџьтәылатә еибашьра (1992-1993) ашьҭахьтәи ашықәсқәа раан ауниверситет аҿиараҿы рлагалеи рыцхыраареи шмаҷым Урыстәылатәии аҳәаанырцәтәии аҵараиурҭақәа. Жәларбжьаратәи аизыҟазаашьақәа дрыхцәажәауа, аректор иазгәеиҭеит ААУ астудентцәа изныкымкәа аԥышәа еимдаразы егьырҭ аҵараиурҭақәа рахь ишцахьоу. Аҵараиурҭа аимадарақәа дрыхцәажәауа Алеко Гәарамиа иазгәеиҭеит ААУ Урыстәылатәии аҳәаанырцәтәии аҵараиурҭақәеи аиқәшаҳаҭрақәа шрыбжьоу.
Алеко Гәарамиа иҳәеит иара изын ишгәахәа дуу апроект имҩаԥнаго хықәкылатәи аусмҩаԥгатәқәа. Иазгәеиҭеит, Лиубимов иеиԥш иҟоу аҟазареи алитературеи рҟны аџьабаа ду збахьоу ҳҵараиурҭа ахь иаара крызҵазкуа хҭысны дшахәаԥшуа.
Урыстәыла аҟазара зҽаԥсазтәыз аусзуҩы Борис Лиубимов иҳәеит ихәыҷратә шықәсқәа раахижьҭеи Аԥсны аԥсабареи ауааи ргәыблра шимоу: «Ас еиԥш иҟоу аԥсабара ԥшӡа змоу ауаа аҟазара злоу жәларуп», - иҳәеит Лиубимов.
Иазгәаҭатәуп Борис Лиубимов иаара хықәкы хадас ишамоу М.С Шьепкин ихьӡ зху Иреиҳау атеатралтә училишье аԥсуа ҿар рҭалара алыршара шакәу. Ҳтәылақәа аусеицуразы ирыбжьоу аиқәшаҳаҭра аҳәаақәа ирҭакӡаны иреиӷьу 15-ҩык аҿар аҵараиурҭа ишҭарҵо. Аԥсуа ҟазара аҭоурых аҟны макьана иҳамам зыӡбахә ҳәоу аҵараиурҭа иалгахьоу аушьҭымҭацәа, убри аҟнытә арыцхә декабр 2 Аԥсны хҭыс дуны аҭоурых иазынхоит ҳәа азгәарҭеит аиԥылара иалахәыз аҵарауаа.
Аусмҩаԥгатә рхы аладырхәит: ААУ актәи апроректор Виқтор Маланӡиа, ААУ аҟазарақәа рыҟәша анапхгаҩы Нугзар Логәуа, Ателеканал «Абаза-ТВ» адиерктор хада Руслан Ҳашыг, РУСДРАМ адиректор хада Иракли Хынҭәба, ААУ аректор ицхырааҩ Анжела Қаџьаиа.