Аԥснытәи аҳәынҭқарратә университет аҟны имҩаԥысит зыхьӡ нагоу урыстәылатәи аҟазараҭҵааҩ Москватәи Шьепкин ихьӡ зху Иреиҳаӡоу (аинститут) апрофессор, аректор Борис Лиубимови ААУ астудентцәеи реиԥылара. 

Аусмҩаԥгатә еиҿыркааит Аԥсны ажурналистцәа Реидгылеи жәларбжьаратәи амедиаклуб "Формат-АЗ".

Аиԥылара рхы аладырхәыит Аԥсны ажурналистцәа Реидгыла ахантәаҩы, ателеилахәыра «Абаза-ТВ» адиректор хада Руслан Ҳашыг, ажурналист Зураб Аргәын, ААУ аҿар рполитика азы апроректор Медеиа Чегиа, иара убас ААУ аҟазара аҟәша актиортә ахырхарҭа астудентцәеи.

Аҵарауаҩ Лиубимов иқәгылара аҟны астудентцәа ирзеиҭеиҳәеит Шьепкин ихьӡ зху аҵараиурҭа аҟны аҵаратә процесс шымҩаԥысуа, иахьатәи аамҭазы изеиԥшроу атеатр аԥсҭазаашьа, иарбан ҵаку уи иааннакылоу.

Аиԥылара ахыркәшамҭаз уи иалахәыз зегьы ирыман алшара Борис Лиубимов азҵаара иҭара.