Акрызҵазкуа арыцхәқәа рамзар аҟны имаҷым аныҳәақәа Аԥснытәи аҳәынҭқарратә университет арҵаҩцәеи астудентцәеи разԥхьагәаҭарала еиҿыркаауа. Убас Аԥсны Аконстиуциа адкылара 27 шықәса ахыҵра иазку Жәларбжьаратәи аҭҵаарадырратә-практикатә конференциа мҩаԥыргеит Аԥснытәи аҳәынҭқарратә университет азиндырратә факультет апрофессор-рҵаҩратә еилазаареи астудентцәеи.
Аусмҩаԥгатә еиҿыркааит азиндырратә факультет адекан, азиндырратә ҭҵаарадыррақәа ркандидат, адоцент Сергеи Смыри, Аҳәынҭқарреи азини ркафедра аиҳабы, азиндырратә ҭҵаарадыррақәа ркандидат, адоцент Белла Ӡиӡариеи.
Аконференциа ааиртит Аԥснытәи аҳәынҭқарратә университет азиндырратә факультет адекан Сергеи Смыр. Адекан иадныҳәаларатә ажәаҿы иазгәеиҭеит: «Аконституциа ажәларқәа зегьы рзы – аҳәынҭқарреи, атәылауаҩреи, адемократиеи ирышьаҭаны ишыҟоу. Абҵарамза 26 Аԥсны аҭоурых аҟны илахьынҵаӡбагахаз рыцхәуп ҳәа, уи аҽны иҳадаҳкылаз Аконституциа ҳтәылазы аҳәынҭқарра зықәгылаз ауасхыр аиқәырхареи, ахьыԥшымра арӷәӷәареи, уашьҭантәи ҳтәыла аҿиаразы зыда ԥсыхәа амамыз аҭагылазаашьаа аԥҵара алнаршеит», - ҳәа.
Аконференциа рхы аладырхәит Урыстәылатәи ажәларқәа реиҩызара ауниверситет (РУДН) ашьаустә зин акафедра аиҳабы, азиндырратә ҭҵаарадыррақәа рдоктор, апрофессор Лиудмила Букалеровеи, Урыстәылатәи ажәларқәа реиҩызара ауниверситет (РУДН) шәачатәи афилиал аинститут азиндырратә факультет адекан, азиндырратә ҭҵаарадыррақәа рдоктор, аполитика ҭҵаарадыррақәа рдоктор, апрофессор Иван Иванников.
Аконференциа аҟны иззааҭгылаз ажәахәқәа азкын Аԥсны Аҳәынҭқарраҟны Аконституциатә ӡбара ароли аҵаки азинтә системеи, Аԥсны Аконституциа ауникалтәра: ашьақәгылареи, ахархәара апроблемақәеи амодернизациеи, Аԥсны Аҳәынҭқарраҟны апарламентаризм аинститути, Аконституциа ашьаҭала ауаҩы изинқәеи ихақәиҭреи ахьчареи уҳәа азҵаарақәа жәпакы.
Аусмҩаԥгатә аҟны ажәахәқәа ́ҟарҵеит 6-ҩык аҵарауаа: ААУ адоцент Хоџьашвили Л.П., азиндырратә ҭҵ.рдоктор Букалерова Л.А., азиндырратә ҭҵ.рдоктор Иванников И.А., ААУ адоцент Ԥилиа Д.Е., Аҳәынҭқарреи азини акафедра арҵаҩы еиҳабы Чамиан Р.С., Аҳәынҭқарреи азини акафедра арҵаҩы еиҳабы Бжьаниа В.В. Астудентцәа рҟынтә 4-тәи акурс азиндырратә факультет астудентка ́Мқанба И.С.