Урыстәылатәи ажәларқәа реиҩызара ауниверситет (РУДН) ашьаустә зин акафедра аиҳабы, азиндырратә ҭҵаарадыррақәа рдоктор, апрофессор Лиудмила Букалеровеи, Урыстәылатәи ажәларқәа реиҩызара ауниверситет (РУДН) шәачатәи афилиал аинститут азиндырратә факультет адекан, азиндырратә ҭҵаарадыррақәа рдоктор, аполитика ҭҵаарадыррақәа рдоктор, апрофессор Иван Иванникови раара хықәкы хадас иаман ААУ аҟны имҩаԥысуаз Жәларбжьаратәи аҭҵаарадырра-практикатә конферециа аҽалахәра.

Аконференциа аусура иалагаанӡа, асасцәа идикылеит ААУ аректор, академик Алеко Гәарамиа. Аиԥылараҟны иазгәаҭан аҵараиурҭақәа рыбжьара агуманитартә еимадарақәеи, егьырҭ аҭҵаарадырреи, а́рҵареи рус иадҳәалоу ахырхарҭақәа рҟны аусеицура алҵшәа бзиақәа шаанарԥшуа атәы. Иара убас, иазгәаҭан аҵыхәтәантәи ашықәсқәа раан имаҷымкәа астудентцәа адипломтә усумҭақәеи, акандидаттә диссертациақәеи шырыхьчахьоу, аха азиндырра ахырхарҭала адиссовет ахьыҟам азы аиҵахарақәа шыҟоу. Асасцәа рыхәҭаахь ари аус аҟны адгылара шыҟарҵо атәы азгәарҭеит.

Асасцәа ражәақәа рҟны ирҳәеит рҵараиурҭа анапхгара разԥхьагәаҭарала онлаинлеи оффлаинлеи ААУ астудентцәа рзы алекциақәа рыԥхьара ргәы ишҭоу.

Аиԥылара рхы аладырхәит ААУ актәи апроректор Виқтор Маланӡиа, ААУ азиндырратә факультет адекан Сергеи Смыр, ААУ азиндырратә факультет А́ҳәынҭқарреи азини акафедра аиҳабы Белла Ӡиӡариа, ААУ аректор ицхырааҩ Анжела Қаџьаиа.