Лыԥсҭазаара далҵит ААУ алагарҭатә ҵара апедагогикеи аметодикеи ркафедра адоцент, апедагогикатә ҭҵаарадыррақәа ркандидат, Аԥсны Иреиҳау ашкол зҽаԥсазтәыз аусзуҩы, "Аџьа аветеран"́ ҳәа амедаль занашьоу Клара Харитон-иԥҳа Кьылба.

Клара Харитон-иԥҳа диит 1929 ш., Ешыра ақыҭа. 1947ш. далгеит Аҟәатәи апедагогикатә училишье, анаҩс аусура далагеит ешыратәи ашкол №34 аҟны.

1955 шықәсазы далгеит Ростовтәи апедагогикатә институт- апедагогикеи аԥсихологиеи рырҵаҩы изанааҭ.

Клара Харитон-иԥҳа лыҭҵаарадырратәии, лырҵаратәии усура далагеит 1958 шықәсазы, А. М. Горки ихьӡ зху Аҟәатәи апедагогикатә институт аҟны. Аҵарауаҩ дравторын 25 инареиҳаны аҭҵаарадырратә усумҭақәа. Клара Харитон-иԥҳа иҭылҵаауаз ахырхарҭақәа рымҽхак ҭбаан, урҭ рахь иаҵанакуеит "Д.И.Гәлиа ирккаратәии-ипедагогикатәии рҿиареи, ипедагогикатә дунеихәаԥшышьеи" ҳәа хыс измаз лкандидаттә диссертациа. 1984 ш. иланашьан "Аџьа аветеран"́ ҳәа   амедаль.   1986 ш. аҵарауаҩ иланашьан Қырҭтәылатәи АССР Иреиҳау ашкол зҽаԥсазтәыз аусзуҩы ҳәа ахьӡ.

1984-1988 шықәса инаркны ААУ апедагогикатә факультет алагарҭатә ҵара апедагогикеи аметодикеи ркафедра деиҳабын.

ААУ апедагогикатә факультет аҟны Кьылба Клара Харитон-иԥҳа дреиуоуп раԥхьаӡа акәны апедагоикеи аԥсихологиеи алекциақәа ркурс аԥсышәала аԥхьара иалагаз. Аҵарауаҩ лааԥсареи ллагалеи рацәоуп раԥхьатәи аԥсуа рҵаҩцәа апатриотизми рзанааҭтә ус агәыбылреи дыркра аус аҟны.

Аԥснытәи аҳәынҭқарратә универсиет апрофессор-рҵаҩратә еилазаареи, арҵаҩцәеи, астудентцәеи гәалсра дула ирыдышшылоит Клара Харитон-иԥҳа лҭаацәеи, лыуацәеи, лҭынхацәеи.

Аҵарауаҩ, арҵаҩы Клара Харитон-иԥҳа лгәалашәара лаша лааӡамҭацәеи, лколлегацәеи, дыздыруаз зегьы ҳгәаҵаҟны наӡаӡа иаанхоит.