Аԥснытәи аҳәынҭқарратә университет аҟны имҩаԥысит Аҩадатәи амшынтә мҩа Ассоциациа алахәылаҩцәа русеицуразы Апрезидент ихаҭыԥуаҩ, Урыстәылатәи Афедерациа асоциалтә-економикатә ҿиаразы иаԥҵоу Арктикатә Хеилак аусуратә гәыԥ алахәыла, Жәларбжьаратәи Арктикатә Хеилак иалоу ауниверситетқәа рлектор Владимир Галлактион-иԥа Харлов илекциа.

Аусмҩпгатә рхы аладырхәыит ААУ аҿар рполитика азы апроректор Медеа Чегиа, абиолого-географиатә факультет адекан Марина Гогәуа, абиолого географиатә факультет апрофессортә-рҵаҩратә еилазаара. Иара убас алекциа рхы аладырхәыит абиолого-географиатә факультет, аекономикатә факультет, жәларбжьаратәи аизыҟазаашьақәа рҟны аҵара зҵо астудентцәа.

Алекциа иалагаанӡа ААУ астудентцәа минуҭктәи ҿымҭрала иргәаладыршәеит цәыббрамза 20 азы Пермтәи аҳәын́ҭқарратә университет аҟны иҭахаз астудентцәа.

Аҵарауаҩ напхгара зиҭо Ассоциациа ахықәкы хадақәа иреиуоуп Аԥсныи Урыстәылеи рыбжьара жәларбжьаратәи аусеицуразы иманшәалоу аҭагылазаашьа аԥҵареи, насгьы, атәылақәа рыбжьара аԥышәаеимдареи рауп.

Владимир Галлактион-иԥа иқәгылара аҟны иҳәеит иахьа аҵараиурҭа аҟны илекциа амҩаԥгара зыбзоуроу ААУ аректор, академик Алеко Гәарамиа шиакәу.

Аҵарауаҩ напхгара зиҭо Ахеилак иалоу разԥхьагәаҭарала имҩаԥгахоит онлаинла жәларбжьаратәи аконферециа, ААУ астудентцәа ирабжьигеит уи рхы аладырхәырц шрылшо.

Алекциа аҳәаақәа ирҭакӡаны астудентцәа рзанааҭ иадҳәалаз азҵаарақәа ирҭон асас. Ассоциациа алахәыла ихәҭаахь ала азҵаарақәа риҭон астудентцәа. Изҵаарақәа рҭак ииашаны иҟарҵеит астудентцәа реиҳараҩык. Аҵарауаҩ инаҵшьны иҳәеит раԥхьаӡакәны иуадаҩыз азҵаарақәа рыла ААУ астудентцәа рҟынтә ишиаҳаз ииашоу аҭакқәа.

Аусмҩаԥгатә асанитар-епидемиологиатә ԥкрақәа зегьы инарықәыршәан имҩаԥган.