Цәыббрамза 9 азы Аԥснытәи аҳәынҭқарратә университет аҟны имҩаԥысит зыхьӡ нагоу урыстәылатәи аҭоурыхҭҵааҩ, ауаажәларратә усзуҩы, Москватәи аҳәынҭқарратә институт жәларабжьаратәи аизыҟазаашьақәа (МГИМО) аполитологиа акафедра апрофессор Андраник Миграниан иԥылара.
Аусмҩаԥгатә еиҿыркааит Аԥсны ажурналистцәа Реидгылеи жәларбжьаратәи амедиаклуб "Формат-АЗ". Урҭ кыр шықәса ҵуеит зыхьӡ нагоу урыстәылатәии европатәии аинтеллектуалтә елита рхаҭарнакцәа Аԥсныҟа иаарыԥхьоижьҭеи.
Аполитолог Андраник Миграниан иԥылара рхы аладырхәит ААУ апрофессортә-́рҵаҩратә еилазаареи астудентцәеи, Аԥсны ажурналистцәа Реидгыла ахантәаҩы, ателеиилахәыра «Абаза-ТВ» адиректор хада Руслан Ҳашыг, аполитикатәии ауаажәларратәии усзуҩы, Аԥсны Ашәарҭадаратә хеилак амаӡаныҟәгаҩ Сергеи Шамба, А́ԥсны аԥыза-министр ихаҭыԥуаҩ, афинансқәа рминистр Владимир Делба, Аԥсны иҟоу Приднестровиа-Молдавиатәи Ареспублика раофициалтә Хаҭарнакра аиҳабы Гарри Кәпалба, Аԥсны иҟоу Аахыҵ Уаԥстәыла ацҳаражәҳәаҩ Олег Боциев, Аԥсны адәныҟатәи аусқәа рминистрра аҟны иҟоу адипломатцәа ҿарацәа Реидгыла алахәылацәеи.
Аиԥылара ааиртит ААУ аректор, академик Алеко Гәарамиа. Уи иқәгылараҿы иазгәеиҭеит А. Миграниан амассатә-информациатә хархәагақәеи, ателехәаԥшреи рҟны еснагь Аԥсныи аԥсуа жәлари ринтересқәа шихьчоз, дшырзықәԥоз. Иахьагьы ари аус ишациҵо. Аректор дахцәажәеит, аполитолог Миграниан 1990-тәи ашықәсқәа раахижьҭеи дшадгылоз Аԥсны Аҳәынҭқарра ахьыԥшымра асуверенитет азхаҵара.
Иазгәаҭатәуп, хәажәкыра 2019 шықәса азы ААУ Аҵарауаа Рхеилак ирыдыркылаз ақәҵара инақәыршәаны Андраник Миграниан ианашьан Аԥснытәи аҳәынҭқарратә университет ҳаҭыр зқәу адоктор ҳәа ахьӡ. Иахьатәи аиԥылара ихы иархәаны ААУ аректор Алеко Гәарамиа уи зыр́шаҳаҭуаз адиплом ииҭеит аексперт Миграниан.
Аусмҩаԥгатә аҳәаақәа ирҭакӡаны апрофессор Миграниан "Урыстәылеи Аԥсныи иахьатәи аамҭазы" ҳәа хыс измаз алекциа даԥхьеит. А́ҵарауаҩ илекциа аҟны иҳәеит Урыстәыла Аԥсны ахьыԥшымра астатус азхаҵауа ашәарҭадаразгьы аҭакԥхықәра ахахьы ишагаз. Аҳәынҭқарра аҿиаразы уи мацара азхом, иаҭахуп аинтеллектуалтә потенциал аизырҳара. Аполитолог Миграниан арҵаҩцәеи астудентцәеи ирабжьигеит рымчи рыхшыҩи еилаҵаны ирааӡарц шаку аҵара змоу, здунеихәаԥшышьа ҭбаау аҿар, амчра ду зку аҳәынҭқаррақәа рҿаԥхьа Аԥсны аҿахәыи аинтересқәеи рыхьчаларцаз.
Аофициалтә хәҭа анаҩс апрофессортә-рҵаҩратә еилазаареи астудентцәеи ирыман алшара аҵарауаҩ иахь азҵаараҭара.
ААУ арҵаҩцәеи астудентцәеи аполитолог Андраник Миграниан иҭабуп ҳәа иарҳәеит иахьатәи аиԥыларазы. Иагьырҳәеит ҷыдала ҳаҭыр ду шырзақә Аԥсны аинтересқәа рыхьчаразы уи имоу ипозициазы.
Аиԥылара мҩаԥысит асанитартә-епидемиологиатә бжьгарақәа зегьы инарықәыршәаны.