Рашәарамза 27 Шәача  имҩаԥысуаз ашьапылампыл азы ачемпионат абыжьбатәи атур аҟны Аԥснытәи аҳәынҭқарратә университет акоманда риааит ачемпионат аҟны аԥызара згоз шәачатәи акоманда "Медик - 2". Актәи атаим ашьҭахь 0:1 ҳәа иаҵахоз  Тамаз Бжьаниа иааӡамҭацәа ирылдыршеит даҽа 2 мпылк амба аҭаршәра, убри алагьы шьаҭанкыла аиндаҭлара алыҵшәа рыԥсахит.
Амбахь ампыл ҭадыршәит Адам Дармавеи Енрик Мықәбеи. 
Аматч аҟны иреиӷьу ахәмарыҩ ҳәа далкаан  Лука Багаҭелиа.
Аԥсны аҿари аспорти русқәа рзы Аҳәынҭқарратә еилакы аспециалист хада Витали Федоренко иазгәеиҭеит акоманда шыхәмаруаз уи  аԥыза,  иреиӷьу абомбардир Леван Логәуа ида.
Аиндаҭлара уадаҩын, аха акоманда ахәмарыҩцәа иаадырԥшит аҟазшьа, аԥсуа шьапылампыласыҩцәа ирылшеит ашьапылампылтә клуб  "Медик" рыстадион аҟны 3 очкок ргара.