Амедицинатә усзуҩы имш шьақәырӷәӷәан жьҭаара 1, 1980 ш. азы Иреиҳаӡоу Асовет Еидгыла Апрезидиум ақәҵарала. Иазгәарҭоит уи рашәарамза ахԥатәи амҽыша аҽны. Ҵыԥх аахишьҭеи ари аныҳәа иамоуп иҷыдоу аҵакы.

Адунеи зегьы аҳақьымцәа, аҿкы чымазара COVID-19 иахҟьаны, зегь реиҳа ихадоу – ауаҩы игәабзиара аиқәырхаразы ааԥсара ҟамҵаӡакуа аџьабаа рбон, иахьагьы ааԥсарада руалԥшьа нарыгӡоит. Аҳақьымцәа рыпрофессионалтә ҩаӡара ҳаракы иабзоураны еиқәырхоуп зықьҩыла ҳтәылауаа рыԥсҭазаара.

Рзанааҭтә мшы азгәарҭоит Аԥснытәи аҳәынҭқарратә университет абиолого-географиатә факультет аҟны 1981 шықәсазы иаԥҵаз «Аексперименталтә биологиеи амедицинеи» акафедра аусзуҩцәагьы. Аҿкы чымазара адунеи иахыҵәо ианалага аамҭазы, акафедра аусзуҩцәеи аҵараиурҭа анапхгареи, Аԥсны Аҳәынҭқарра Агәабзиарахьчара аминистрреи рыхшыҩ еилаҵаны астудентцәеи аусзуҩцәеи ргәабзиара ахьчаразы иазԥхьагәарҭеит еиуеиԥшымыз аусмҩаԥгатәқәа. «Аексперименталтә биологиеи амедицинеи» акафедра аԥшьгарала ААУ аҵаратә процесс иалагаанӡа аҿкы чымазара ауааԥсыра рацәыхьчаразы ауниверситет аусзуҩцәа рыбжьара акороновирус алкааразы атестмҩԥгара иахыжьын, убри алагьы ишьақәдыргылон ачымазара иаҿагыло риммунитет аҭагылазаашьа. Иахьагьы аҵараиурҭаҿы аусзуҩцәеи астудентцәеи ргәабзиара аиҷаҳаразы аԥкрақәа зегьы ирықәныҟәоит.

Ҳаҭыр зқәу амедицинатә усзуҩцәа! Шәныҳәамш азы ишәзеиӷьаҳшьоит агәабзиара, аманшәалара, ақәҿирақәа.