Аԥсны Раԥхьатәи Ахада, Аԥсны Афырхаҵа, "Ахьӡ-Аԥша" аорден I аҩаӡара занашьоу, аҭоурыхтә ҭҵаарадыррақәа рдоктор Владислав  Арӡынба иԥсы ҭаны дыҟазҭгьы 76-шықәса ихыҵуан.

Аҭоурых аҟны иҟалалоит убас еиҧш аамҭақәак, жәларык рыҟазаареи рыҟамзаареи ҳәа азҵаара анықәгыло, урҭ ианрыцу ахьаа, агәырҩа ҧхьаҟатәи абиҧарақәа рҧеиҧш лаша иадҳәалоу. Уи аамҭа уадаҩаз зыҧсҭазаара зегьы Аҧсны ахақәиҭреи ахьыҧшымреи ирзызкыз Аԥсны Раԥхьатәи Ахада, имч, илша, иԥсҭазаара зегьы иуаажәлар, иԥсадгьыл рымаҵ аура иазикит. Владислав ижәлар драԥхьагылан, дрықәгәыӷуан, рыгәра игон, игәра ргон. Иара ихаҭара, ипатриотизм, иӷәӷәара, ифырхаҵара, иҟәыӷара  еиҵагыло абиԥарақәа рзы
ҿырԥшыганы иаанхоит. Владислав илахьынҵа мҩаҿы иԥылаз аԥышәара хьанҭақәа хьыӡла-ԥшала дрылҵит.
Аԥсуа жәлар рҭоурых аҟны Владислав Арӡынба – ажәлар драԥхьагылаҩны, аиааира дасимволны даанхоит. Иҧшьоу игәалашәара аҿаҧхьа ҳхырхәоит!