Хәажәкыра 16 азы Аԥснытәи аҳәынҭқарратә универсиетет аҟны имҩаԥысит ААУ аректор, апрофессор, академик Алеко Гәарамиеи Аԥсны аҿари аспорти русқәа рзы Аҳәынҭқарратә еилакы ахантәаҩы Џьемал Гәбази реиԥылара.

Аиԥылараҟны иалацәажәеит 2021 шықәсазы астудентцәа рыбжьара имҩаԥгахо урыстәылазегьтәи "Амилаҭтә студенттә шьапылампылтә лига" Аԥсны ашьапылампыл азы астудентцәа реизга ралархәра атәы.

Џьемал Гәбаз еиҭеиҳәеит, ари ахырхарҭаҟны Аԥсны Аҳәынҭқарратә комитет имҩаԥнагахьоу аусура.

Атурнир мҩаԥысуеит ақалақь Евпаториа, мшаԥымза инаркны ԥхынҷкәынмзамнӡа. Аицлабра мҩаԥгахоит ҩ-дивизионкны (Иреиҳауи Актәии) 16-16 команда ахьыҟоу, урҭ рахьтә 5 шьақәгылоуп ареигионалтәбжьаратә турла. Ҳара ҳкоманда ахы аланархәеит актәи адивизион. Уажәы акоманда арҵаратә-ҽазыҟаҵаратә еизга иахысуеит, - ҳәа азгәеиҭеит Џь.Гәбаз.

Иара иажәақәа рыла, аԥсуа шьапылампыласыҩцәа астуденттә спорт аҿиаразы ԥхьаҟатәи рԥеиԥш иацхыраагӡоу еицлаброуп.

Алеко Гәарамиа иазгәеиҭеит, ауниверсиет аганахьала, ари аус ацхыраареи адгылареи шарҭо.

Аҩ-ганкгьы иаадырԥшит агәыӷра, қәҿиарала аусеицура шалыршахо ала.