Жьҭаарамза 13 рзы Аԥснытәи аҳәынҭқарратә университет аҟны имҩаԥысит аректорат аилатәара. Амшхәаԥштә аҟны зҵаара хаданы иқәгылан ҳтәылаҿы ишьақәгылаз аепидемиологиатә ҭагылазаашьа аан  ауниверситет аҟны аҵаратә процесс шымҩаԥысуеи, апандемиа аҽацәыхьчаразы иаԥҵоу аԥҟарақәа ишрықәныҟәои, насгьы аҿкы  аламырҵәаразы имҩаԥгоу аусхкқәеи ртәы.

Афакультетқәа рдеканцәа ахцәажәеит  иахьатәи аҭагылазаашьаан аҿкы аламырҵәаразы изықәныҟәо аепидемиологиатә ԥкрақәа. Иазгәаҭатәуп ААУ аҟны аҵаратә процесс амҩаԥгара иалагаанӡа   аауа рацәа аамҭаказы еиқәымшәарц азы, аҵараиурҭа анапхгара афакультетқәеи акурсқәеи рҟны ишьақәдыргылахьн рхатәы еихшанҵа. Иҟоуп агәыԥкәа онлаинла зҵара иацызҵо. Анапхгаҩцәа иазгәарҭеит ашоура змоу астудентцәеи, зҭаацәараҿы аҿкы чымазара ахьыҟоуи, мамзаргьы ачымазара зцәа иалоу  агәҩара ахьрымоу астудентцәа рҵара аҟынтәи ишаурышьҭуа. Ус еиԥш иҟоу аҽыхәшәтәра иахысуеит.

Аҵараиурҭа анапхгареи ААУ аексперименталтә биологиеи амедицинеи  ркафедра аусзуҩцәеи  аҭагылазаашьа ииаиԥмырҟьаӡакәа иҭырҵаауеит. Дара ргәаанагарала аҵараиурҭа аҟны  аҵаратә процесс  амҩаԥгаразы иахьазы иуадаҩӡоуп ҳәа уҳәартә иҟам. Убарҭқәа зегьы ҳасаб рзуны иазыӡбан аҵаратә процесс ацҵара, аха убри аан иазааҭгылеит аепидемиологиатә ҭагылазаашьа уадаҩхар аҵаратә процесс шаанкылахо. ААУ анапхгара рзын зегь реиҳа ихадароуп астудентцәеи аусзуҩцәеи ргәабзиара.