Азҵаара рыҭара

Аԥсны раԥхьаӡатәи аԥсуа поетесса,жәлар рышәҟәыҩҩы Нелли Ҭарԥҳа лгәалашәара иазку ахәылԥаз

 Хәажәкыра 13 рзы ААУ аԥсуа филологиатә факультет аҟны имҩаԥысит Аԥсны раԥхьаӡатәи апоетесса, Жәлар рышәҟәыҩҩы, Дырмит Гәлиа ихьӡ зху Аҳәынҭқарратә премиа алауреат Нелли Золоҭинск-иԥҳа Ҭарԥҳа лгәалашәара иазку ахәылԥаз.

Ари амш азы ааԥхьара рыман апоетесса лҭаацәа – лԥа, лыԥҳацәа, лмаҭацәа, илызгәакьоу ауаа, лҭаца «Аԥсны анацәа аҭынчреи асоциалтә иашареи рзы» ахантәаҩы Гәыли Кьычԥҳа.

Аусмҩаԥгатә рҽаладырхәит ашәҟәыҩҩцәа, ауаажәларратә усзуҩцәа; Аԥсны ашәҟәыҩҩцәа Реидгыла ахантәаҩы В.Аԥҳазоу, апоет Геннади Аламиа, Н.З.Тарԥҳа лҩыза гәакьа Аԥсны зҽаԥсазтәыз арҵаҩы, «Ахьӡ-аԥша» III аҩаӡара занашьоу Нина Давыд-иԥҳа Агрба, афилологиатә ҭҵаарадыррақәа ркандидат, Аԥснытәи аҳәынҭқарратә университет аԥсуа литература акафедра адоцент, Д. И. Гәлиа ихьӡ зху Аԥсуаҭҵааратә институт аҭҵаарадырратә усзуҩы еиҳабы Тыжын Али Чуреи, апоетессацәа Гәында Кәыҵниаԥҳаи, Гәында Сақаниаԥҳаи,афилологиатә факультет адекан Б.Хагәышь, ААУ апрофессор-рҵаҩратә еилазаареи, астудентцәеи.

Минуҭктәи аҿымҭрала еизаз иргәаладыршәеит Аԥсны Аџьынџьтәылатә еибашьраан иҭахаз аҵеицәа.

Аиԥылара ааиртит ААУ аректор А.А. Гәарамиа: «Ҳаҭыр зқәу иахьа иааиз зегьы! Ҳаҭыр зқәу сколлегацәа, астудентцәа, арҵаҩцәа. Нелли Золоҭинск-иԥҳа Ҭарԥҳа лааԥсарақәа рацәоуп апоезиеи, адрамматургиеи, апублицистикеи рҿы. Зегь раԥхьаӡа иргыланы уи дпатриотын, лыԥсадгьыли лыжәлари рыԥшӡара дырзышәаҳәон лырҿиамҭакәа зегьы рҿы, лҩымҭақәа ҳлитература аҟны ахаан имыӡуа иаанхоит».

Афилологиатә ҭҵ.рк., аԥсуа литература акафедра аиҳабы – Д.С.Аџьынџьал инарҭбааны дрыхцәажәеит Н.З.Тарԥҳа лыԥсҭазаареи лырҿиаратә мҩеи, дазааҭгылеит уи апоезиа иаҷыдангьы апрозеи адрамматургиеи аус шырзылухьаз.

Аԥсуа филологиатә факультет астудентцәа исахьаркны иаԥхьон ашәҟәыҩҩы лажәеинраалақәа, лпоемақәа, инарыгӡон ашәақәа.

Апоетесса лбаҩхатәра иахцәажәоз иазгәарҭон лырҿиамҭақәа зегьы рҿы лхатә бжьи, лхатә гьамеи рыла аӡәгьы дышиламҩашьоз.

Аиԥылара хыркәшо апоетесса лыԥҳа – Аԥсны Ахәыҷтәы фонд ахантәаҩы А.К.Ломиа иҭабуп ҳәа ралҳәеит ААУ аусзуҩцәа, ас еиԥш иҟоу агәалашәаратә хәылԥазқәа реиҿкааразы, хаҭала аԥсуа филологиатә факультет иабзоураны аԥсуа бызшәа еицамкрада иахьықәыҩуа аҵараиурҭаҿы, иуникалтәу факультетуп ҳәа азгәалҭеит лара.