Русская версия

Аԥсны Ареспублика, ақ. Аҟәа, Ауниверситеттә мҩа 1
Адкыларатә комиссиа: +7 (840) 223-10-17; Асекретариат: +7 (840) 223-10-19

Ажәабжьқәа

ААУ аҿы имҩаԥган апоет-алирик, ашәҟәыҩҩы   Терент Михаил-иԥа Ҷаниа диижьҭеи 80 ш. аҵра иазку аиԥылара.

ААУ аҿы имҩаԥган апоет-алирик, ашәҟәыҩҩы Терент Михаил-иԥа Ҷаниа диижьҭеи 80 ш. аҵра иазку аиԥылара.

Февраль 28 рзы, ААУ афилологиатә факультет аҟны имҩаԥысит ашәҟәыҩҩы, ажурналист, Аԥсны акультура зҽаԥсазтәыз аусзуҩы Терент Михаил-иԥа Ҷаниа диижьҭеи 80 ш. аҵра иазку аиԥылара. Уи изныкымкуа асахьаркыратә литература абзиабаҩцәа иргәырӷьахьеит иажәеинраалақәеи егьырҭ иҩымҭақәеи рыла. Терент Ҷаниа 20 инареиҳаны ашәҟәқәа авторс дрымоуп.
  Иажәеинраалақәа ирылхуп ҳтәылаҿы бзиа еицырбо "Аԥсны азы ашәа", "Абираҟ", "Бара быда дыҟаӡам", "Ашықәс ҿыц аауеит" ухәа имаҷымкәа  ашәақәа.

Аныҳәатә аиԥылара аартуа аиубилиар иирамш идиныҳәалеит афилологиатә факультет адекан Арда Ашәба «Ишәзеиӷьаҳшьоит ақәра рацәа, ақәҿиарақәа, агәалаҟазаара бзиа. Гәахәарыла ҳрыԥхьоит шәажәеинраала ссирқәа, ҳарзыӡырыҩуеит шәашәақәа»- иҳәеит адекан.
Аԥсуа литература акафедра арҵаҩы,  Ахра Анқәаб иҳәеит Терент Ҷаниа дшыруаӡәку асахьаркыратә ажәа ааԥсара ҟамҵаӡакәа амаҵ азызуа.
Ажурнал «Алашара» аредактор хада Анатоли Лагәлаа, изгәеиҭеит Аҧсуа литература аҿиараҿы апоет илагала шмаҷым атәы. «Апоет, апрозаик, иҩышьа аформа акагьы иалаҩашьом, инапы злаикуа зегьы иқәҿиоит,»- иҳәеит иара.

Арҿиара агәацԥыҳәара иманы иахьа абас дааиуеит 80 ш. иагьырацәам, аха иагьмаҷӡам. Ҳара иажәа ихшыҩ иҟәыӷара еснагь иҳацуп иҳәеит - Аԥсны ашәҟәыҩҩцәа реидгыла ахантәаҩы Вахтанг Аԥхазоу.
"Ари еиԥш аиԥыларақәа реиҿкаара маҷк иуадаҩзаргьы, урҭ ирыҵаркуа маҷӡам, избан акәзар, ҿыц еиҵагыло абеиԥара еиднакылоит, еизааигәанатәуеит. Абраҟа еиқәшәаз зегьы ажәа алԥха шәыманы, агәабзиара шәыманы Анцәа иҟаиҵааит", — иҳәеит Вахтанг Аԥхазоу.
Ахәылԥаз аҟны еизаз зегь рзы апоет дырзаԥхьеит аҵыхәтәантәи аамҭазы иҩҩыз иажәеинраалақәа. Астудентцәа Терент Ҷаниа ашәҭқәа ирҭеит, иара убас ирыԥхьеит апоет иажәеинраалақәа.  
Апоет иубилиеи идныҳәало акомпозитор Кәасҭа Ченгелиа ашәақәа наигӡеит.
Аиԥылара хыркәшо Терент Михаил-иԥа Ҷаниа акафедра аусзуҩцәа иҭабуп ҳәа реиҳәеит, ас еиԥш иҟаз аиԥылара ахьеиҿыркааз азы.