Русская версия

Аԥсны Ареспублика, ақ. Аҟәа, Ауниверситеттә мҩа 1
Адкыларатә комиссиа: +7 (840) 223-10-17; Асекретариат: +7 (840) 223-10-19

Факультеты

Аекономикатә факультет

Афакультет ишьаҭаркын 1980ш. азы. Уи аартреи, ашьақәгылареи ибзоуроуп изаамҭаныкәа зыԥсҭазаара иалҵыз раԥхьатәи адекан РНАН акорреспондентрахь алахәыла, аекономикатә наукақәа ркандидат Феизба И. Р. 

Ари афакультет еснагь аҿиареи, аизҳареи рымҩа иануп. Аха иҳаҩсыз ашәышықәса 90 ашықәсқәа рзын имҩаԥысыз аамҭатә еибырххарақәеи, ауаажәларатә еиҭакрақәеи араҟагьы анырра ҟарҵеит. Иара убас аеканомикатә факультет аганахь изаанымхеит 1992 - 1993тәи аш. еиқәаҵәақәа раангьы. Афакультет арҵаҩцәеи, астудентцәеи аԥсадгьыл ахьчараз инагылеит.Рыԥсадгьыл рхы ақәырҵеит адекан ихаҭыԥуаҩ Закнбеи Амаршьан, астудентцәа А.Гуарамиа, О.Бараҭелиа, Б.Адлеиба, Б.Маршьан,  А.Ажьиба, А.Ашуба, А.Бигуаа, Б.Гәонџьуа, О.Гумба, М.Догәуӡиа, Б.Касланӡиа, Б.Малиа, А. Мирзоиан, Х.Нанба, Р.Халбад. А.Шьаҟрыл, О.Шьынқәба.

Аибашьра ашьҭахь ауадаҩрақәа рацәаны ишыҟазгьы афакультет иалшеит Аԥсны аекономика арҿиара аус аҽалархәра. Ианаартыз аамҭа инаркны иахьа уажәраанӡа, уаҟа аҵар хдырқәшахьеит 1800-ҩык астудентцәа. Урҭ реиҳараҩык Аԥсныи уи анҭыҵи қәҿиарала аус руеит.
2008 ш. рзы афакультет ииасит раԥхьаӡа акәны, система ҿыцла акадыр ҿыцқәа реиҵааӡара абокалавртә программа аусхкала. Иахьатәи аамҭазы зызбахә ҳамоу афакультет аҟны аҵара рҵоит 370-ҩык астудентцәа. Урҭ зегьы азыҟарҵоит Урыстәылатәи аҵарадырра апрограмма астондартқәа инарықәаршәаны.

Афакультет дахагылоуп аекономист Бараҭелиа Б.В. (аекон.тҵ.рканд., адоцент), афакультет иаҵанакуеит акафедрақәа - 6.

- "Аекономикатә теориа" - акафедра напхгара аиҭоит Лагәлаа Р.М. (аекон.ҭҵ., рдоцент)
-"Аҳасбреи, аҳасбеилыргара ауси" - акафедра напхгара аиҭоит Шамба О.Б.(аекон.тҵ.рканд., ЛИЕС акад., апроф.)
-"Амилаҭтә економика" - акафедра дахагылоуп Кәыбраа Б.С.(аекон.тҵ.рканд., адоцент)
-"Аҳәынҭқарратә напхгараҭареи,аменеџьменти" - акафедра амаҵ азиуеит Шьалашьаа З.И.(аекон.ҭҵ.рд., апроф.)
-"Афинансқәеи акредитыи" - акафедра дахагылоуп Селишев А.С.(аекон.ҭҵ.рд., апроф.)
-"Иреиҳазӡоу аматематика" - акафедра напхгара аиҭоит Хашба Г.Н.(аекон.ҭҵ.рканд., апроф.)

Афакультет аҟны аҵарадырратә процесс мҩаԥыргоит: 4-ҩык апрофессорцәеи, 15-ҩык анаукатә кандидатцәеи, адоцентцәеи, иара убас абанкқәеи, абизнес уааи рспециаалистцәеи.
Афакультет акафедрақәа  иахьа аус рыдырулоит Аԥсны, егьырҭ Аҳәынҭқаррақәеи аекономика аганахь ала аус еицура аҭагылазаашьа арманшәаларазы.Уи аусхк азы имҩаԥысуа аконференциақәеи, афорумқәеи рыҟны акырынтә иқәгылахьеит. Аҵыхәтәантъәи ажәашықәса ирҭагӡаны афакультет аусзыҩцәа ирылдыршаеит ахьчара доктортә диссертациак, 15-кандидатә диссертациақәеи; иҭыжьуп х-монографиаки, х-шәҟәыки, 66-рҵагатә цхыраагзқәеи, икьыԥхьуп 180-инареиҳаны астатиақәа.

Ари афакультети Урыстәыла иналукааша иреиҳау аҵараиурҭақәеи аимадара рыбжьоуп. М.В.Ломоносов ихьӡ зхыу Москватәи аҳәнҭқарратә университетети, Санкт-Петербургтәи аекономикеи афнансқәеи руниверситети уахь иналаҵаны. Аусеицура аус нанагӡоит ауниверситетқәа рҵара-методикатә еидкылара аҳәаақәа ирҭагӡаны, аконференциақәа ахалархәреи, аҭҵаратә кадрқәа разыҟаҵареи, аметодикатә цхыраара рыҭара ацәаҳәа ала.